10 yanvar 2012 16:07
Qarabağ da 2012-ci ilə start verdi
“Qarabağ” 2012-ci ilə start verib. Azerisport.az xəbər verir ki, dekabrın 21-də baş tutan Premyer Liqanın XVIII turundan sonra 20 günlük istirahətə yollanan komanda bu gün yeni ilin ilk hazırlığını keçib.
Komandanın baş məşqçisi Qurban Qurbanov “Barcelona”nın düşərgəsinə yollandığına görə futbolçuları məşqə Müşviq Hüseynovla Elçin Rəhmanov çıxarıb. Surxanı qəsəbə stadionuna yollanan komanda məşqə heç də əsas heyətlə çıxmayıb. Belə ki, legionerlər bu gecə Bakıda olacaq.
Eyni zamanda yeni əməliyyat olunan Rəşad Sadıqov hələ də bərpa prosesi keçir. Vüqar Nadirovun əmisi rəhmətə getdiyinə görə 24 yaşlı forvard ilin ilk məşqini buraxmalı olub. Məşq isə yüngül tempdə keçib. Futbolçular qaçışla kifayətləniblər. “Qarabağ”ın sabahkı məşqi yenə də Suraxanı qəsəbə stadionunda olacaq.
