11 yanvar 2012 00:11
Millimizin məşqçisi fiaskonun səbəblərini açıqladı
Valentin Qranatkinin xatirəsinə həsr olunmuş turnirdə 19 yaşadək futbolçulardan ibarət Latviya və Azərbaycan yığmaları arasında keçirilmiş oyundan sonra millimizin baş məşqçisi Vəli Qasımov matçla bağlı fikirlərini dilə gətirib. Azerisport.az xəbər verir ki, o, komandamızın 1:2 hesablı məğlubiyyəti ilə bağlı bunları dilə gətirib:
“Təbii ki, nəticədən razı deyiləm. Ümumilikdə, turnir bizim üçün çox çətin keçdi. Məğlubiyyətlərimizin əsas səbəblərindən biri turnirə eksperimental heyətlə gəlməyimizdi. Yeni futbolçuları sınaqdan keçirdik. Oyunlarımızın təhlilini apararaq deyə bilərəm ki, heyətdə köklü dəyişikliklər edilməlidi. Bütün mövqelərdə yeni futbolçulara ehtiyacımız var. Qapıçılarımızın da zəif çıxışını qeyd edərdim. Belə heyətlə Avropa çempionatının seçmə mərhələsində uğur qazanmaq olmaz.
Düşünürəm ki, turnirdə hakimliyin səviyyəsi qənaətbəxş deyildi. Finlandiya yığması ilə oyunda böyük hesabla məğlubiyyətimizə hakim səhvi ciddi təsir göstərdi. Eləcə də, digər qarşılaşmalarda analoji hallarla üzləşdik. Məsələn, hər hansı qayda pozuntusuna görə futbolçumuza vərəqə göstərildiyi halda, oxşar vəziyyətdə rəqibə qarşı müvafiq addımın atılmadığının dəfələrlə şahidi olduq”.
