12 yanvar 2012 01:49
Araz və komandası Yunanıstan kubokunun 1/4 finalında (YENİLƏNİB)
Bu gün futbol üzrə Yunanıstan kubokunda 1/8 final mərhələsinin oyunları keçirilib. Azerisport.az xəbər verir ki, Azərbaycanın gənclərdən ibarət yığmasının üzvü Araz Abdullayevin çıxış etdiyi “Panionios” növbəti mərhələyə vəsiqə qazanıb.
Lakin həmyerlimizin komandasını kifayət qədər ciddi rəqiblə - Yunanıstanın ən iddialı klublarından olan “Panathinaikos”la duel gözləyirdi. Arazın komandası üçün əsas üstünlük bu oyunun doğma meydanda keçirilməsi hesab olunurdu. Meydan sahibləri əsas və əlavə vaxtda qol vura bilməyiblər. Amma "Panionios" penalti seriyasında güclü rəqibini yenməyib bacarıb - 4:3.
Qeyd edək ki, Abdullayevin bu oyunda ilk dəfə start heyətində meydana çıxması gözlənilirdi. Gözlənildiyi kimi, baş məşqçi ona ilk dəqiqələrdən oynamaq imkanı yaradıb. 88-ci dəqiqədə isə həmyerlimiz yerini digər oyundaşına verməli olub. Bu üzdən o, penalti seriyasında da iştirak edə bilməyib.
Yunanıstan kuboku
1/8 final mərhələsi
11 yanvar
Panionios - Panathinaikos - 0:0 (penaltilərlə 4:3)
