12 yanvar 2012 18:20
Rail Məlikov: XL ilə yanaşı digər rəqibləri də düşünmək lazımdı
“Neftçi”nin kapitanı Rail Məlikov azerisport.az saytına müsahibəsində komandasının hazırlığından, eləcə də Emil Mpenzanın mümkün gedişindən danışıb.
- Artıq qış hazırlıq prosesinə start vermisiz. Hazırlıqlarınız necə gedir?
- “Neftçi” bu hazırlığa çox ciddi yanaşır. Türkiyədə bütövlükdə 24 gün keçirəcəyik. Bu müddət ərzində bizi xeyli yoxlama matçı gözləyir. Bəli, biz çempionata liderlik edirik. Amma bu, heç nəyə əsas vermir. Çünki ən yaxın izləyicimizdən cəmi 1 xal öndəyik. “Altılıq” mərhələsində daha rahat çıxış etmək üçün fevralda baş tutacaq oyunlardan maksimum nəticə ilə ayrılmalıyıq. Ona görə də bu təlim-məşq toplanışında ciddi hazırlaşmalıyıq.
- Bu hazırlıq zamanı sizi beynəlxalq turnir də gözləyir...
- Bu turnirdə “Terek”, “Rapid”, “Steaua” kimi ciddi klublar da çıxış edəcəklər. Ümumiyyətlə, mən güclü komandalarla qarşılaşmağın tərəfdarıyam. Çünki belə komandalarla oyunlarda nəticə önəmli olmasa da, bunun faydası çox böyük olur.
- Böyükağa Hacıyevin gəlişindən bəri komandanızda nə dəyişib?
- Hər baş məşqçinin öz oyun üslubu olur. “Neftçi” isə hər məşqçisi ilə ancaq çempionluq üçün mübarizə aparıb. Hacıyevin gəlişindən sonra biz daha çox hücum etməyə başlamışıq. Komanda doğru yoldadı.
- Emil Mpenza kimi futbolçunun “Neftçi”də özünü göstərə bilməməsinin səbəbini nə ilə izah edərdiz?
- Mpenza yaxşı futbolçudu. Amma komandada çox ciddi rəqabət var. Görünür, Mpenza belə rəqabət olacağını gözləmirmiş. Buna görə də bacarmadı. Bahodir Nasimov uğurlu çıxış edəndə, Mpenza üçün heyətə düşmək çox çətin olurdu.
- “Neftçi” üçün bu il nə dərəcədə vacibdi?
- Biz həm çempionatda, həm də avrokuboklarda mümkün qədər yaxşı çıxış etməyə çalışırıq. Ümid edirəm ki, yaxşı oyunla yenidən ölkə çempionu olmağı bacaracağıq. Amma çempionatda güclü rəqabət var. Yalnız “Xəzər Lənkəran”ı yox, digər rəqibləri də düşünmək lazımdı.
- Biz həm çempionatda, həm də avrokuboklarda mümkün qədər yaxşı çıxış etməyə çalışırıq. Ümid edirəm ki, yaxşı oyunla yenidən ölkə çempionu olmağı bacaracağıq. Amma çempionatda güclü rəqabət var. Yalnız “Xəzər Lənkəran”ı yox, digər rəqibləri də düşünmək lazımdı.
- Yəqin ki, bu mənada daha çox “İnter”i fərqləndirərdiz...
- Ciddi rəqibdi. “İnter” son oyunlarını çox yüksək səviyyədə keçirdi. “Bankirlər”lə yanaşı “Qarabağ” da var. Əminəm ki, onlar da mövsümün qalan hissəsini yüksək səviyyədə keçirəcəklər. “Bakı”yla “Qəbələ”ni də siyahıdan silmək olmaz. Amma bu kampaniyada ən güclü biz olmalıyıq.
