18 yanvar 2012 13:11
Azərbaycan yığması FİFA reytinqində irəlilədi
FİFA dünyanın futbol yığmalarının növbəti reytinq siyahısını açıqlayıb. Azerisport.az xəbər verir ki, Azərbaycan yığması yeni ilin ilk ayı üçün açıqlanan siyahıda 1 pilləlik irəliləyişə nail olub.
Berti Foqtsun komandası hazırda 111-ci pillədə qərarlaşıb. Komandamızın hesabında 300 reytinq xalı var.
DÇ-2014-ün seçmə mərhələsində yığmamızın rəqiblərindən olan komandalar arasında yalnız Lüksemburqu qabaqlayırıq (127-ci yer; 252 xal). Hansı ki, bu komanda da bir pilləlik irəliləyişə nail olub. Bizdən öndə olanlar isə bunlardı – Portuqaliya (7; 1100), Rusiya (13; 971), İsrail (37; 665) və Şimali İrlandiya (87; 403). Rəqiblərimizin əksəri ötən aykı mövqeyində qalsa da, Rusiya bir pillə geriləmək məcburiyyətində qalıb.
İlk onluqda isə heç bir dəyişiklik olmayıb. Birinci pillədə yenə İspaniya gedir (1564), ikinci Hollandiya (1365), üçüncü Almaniyadı (1345). Uruqvay dördüncü (1309), İngiltərə beşinci (1173), Braziliya altıncı (1143), Portuqaliya yeddinci (1100), Xorvatiya səkkizinci (1091), İtaliya doqquzuncudu (1082). İlk onluğu Argentina yığması qapayır (1067).
Növbəti reytinq siyahısı fevralın 15-də açıqlanacaq.
