18 yanvar 2012 14:57
Starkovdan gənclərə dəstək
Türkiyədə ilk təlim-məşq toplanışını yekunlaşdırmaqda olan "Bakı" hazırlıqlara gündə iki məşqlə davam edir. Azerisport.az xəbər verir ki, toplanışın 9-cu günü taktiki və nəzəri çalışmalar üzərində qurulub.
İlk dəfə əsas komandanın düşərgəsinə qoşulan gənc futbolçular - müdafiəçi Elşad Manafov və hücumçu Tural Qürbətov da həmkarlarından geri qalmamağa çalışırlar. Adıçəkilən futbolçuların cəmi 18 yaşı var və onların A komandada debütü Hollandiya çempionatının lideri "AZ Alkmaar" klubuna qarşı oyuna təsadüf edib.
Tural Qürbətov qarşılaşmanın 65-ci dəqiqəsində oyuna qoşulub, Elşad isə 83-cü dəqiqədə meydana çıxıb. Ümumiyyətlə, komandanın ilk yoxlama oyununda meydanda 8 azərbaycanlı futbolçu çıxıb. 30 dəqiqə oynayan Nurlan Novruzovun da artıq mütəmadi olaraq heyətdə yer aldığını qeyd edək.
Sabah (19 yanvar) komanda ikinci yoldaşlıq oyununa çıxacaq. Həmin oyunda rəqib Almaniya 1-ci liqasının təmsilçisi "İnqolştadt 04" (FC İngolstadt 04) klubudu. Oyun Bakı vaxtı ilə saat 19:00-da başlayacaq.
