19 yanvar 2012 13:05
“Bizi sevindirən əsas məqam ağıllı futbol oynamağımızdı”
“Riga Open Cup 2012” turnirinin qalibi olan “Qəbələ”nin 13 yaşadək futbolçulardan ibarət komandasının baş məşqçisi Recep Yazıcı bu uğur münasibətilə fikirlərini açıqlayıb. Azerisport.az xəbər verir ki, türk məşqçi klubun rəsmi saytına müsahibəsində bunları dilə gətirib:
“İlk dəfə akademiyamızın komandası beynəlxalq turnirdə birinci yeri tutdu. Qalib gəlmək hər zaman çox gözəldi, xüsusilə 5 yerli komandanın əlindən kuboku alıb Azərbaycana gətirmək, doğma bayrağımızı xarici ölkədə dalğalandırmaq qürurverici hadisədir. Klub, akademiya rəhbərliyini və futbolçuları təbrik edirəm. Bu qrupun məşqçisi Sərdar Qafarovu xüsusi qeyd etmək istəyirəm. Çünki komandamız təsadüfi qollar vuraraq qalib gəlmədi. Hər kəsi bizi alqışlamağa məcbur etdik. Təbii ki, bu cür oyun göstərmək üçün durmadan çalışmaq, məşq etmək lazımdı. Bizim komandamız bu çətin məşq proseslərindən sonra bu səviyyədə oyun sərgiləyir. Təbii ki qələbə xoşdu, amma bizi sevindirən əsas məqam da məhz ağıllı futbol oynamağımızdı. Ümid edirəm ki, kuboklarımızın, qələbələrimizin, uğurlarımızın davamı gələcək və bir neçə il sonra bu komandada çıxış edən futbolçular milli komandamızın və “Qəbələ”nin əsas heyətinin şərəfini qoruyacaqlar. Bu uğur bizim doğru yolla irəlilədiyimizin növbəti sübutudu”.
