22 yanvar 2012 01:12
Fatih Kavlak: Bu, bizə çatışmazlıqları görməyə imkan verəcək
“Qəbələ”nin baş məşqçisi Fatih Kavlak Türkiyədəki hazırlıq prosesi çərçivəsində geridə qalan iki günün istədikləri kimi keçdiyini bildirib. Azerisport.az xəbər verir ki, o, klubun rəsmi saytına açıqlamasında bunları dilə gətirib:
“Hazırlıq prosesi istədiyimiz səviyyədə, tempdə gedir. Məşqlərimiz maraqlı keçir. Futbolçuların fiziki gücü günbəgün artır. Psixoloji durumları da yüksək səviyyədədi. Hamısı çox istəklidi. Sabahdan (bu gündən) yoxlama oyunlarına start veririk. İlk rəqibimiz “Qazaxıstanın “Atırau” komandası olacaq. Rəqibimizi elə də yaxşı tanımıram. Sadəcə bilirəm ki, komanda Qazaxıstanın yüksək liqasında çıxış edir. Bu oyunda iki gündə necə hazırlaşdığımızı gözdən keçirəcəyik”.
Kavlak rəqiblərinin gücünə görə komandanın çatışmazlıqlarını müəyyənləşdirəcəklərini söyləyib: “Rəqib kimi hazırlıq prosesinin sonuna doğru daha güclü rəqiblərlə qarşılaşacağıq. Bu bizə komandanın hazırlıq prosesini necə dəyərləndirdiyini və çatışmazlıqları görməyə imkan verəcək”.
Baş məşqçi əvəzedici komandanın heyətindən əsas komandanın hazırlıq prosesinə cəlb olunan Ürfan Abbasov və heyətdəki digər gənc futbolçuların hazırkı durumundan razı olduğunu da sözlərinə əlavə etdi: “Qəbələdə keçirdiyimiz təlim-məşq toplanışından sonra Ürfan Abbasovu da Antalyaya gətirməyə qərar verdik. Hazırda Ürfan çalışqanlığı ilə bizim doğru qərar qəbul etdiyimizi sübüt edir. Digər gənc futbolçuların da fiziki durumu və futbolçu bacarıqları müsbət istiqamətdə inkişafdadır”.
