23 yanvar 2012 17:41
Bakı Argentina və Xorvatiyadan oyunçu aldı
“Bakı”nın iki əcnəbi futbolçu transfer etməsi barədə xəbər vermişdik. Azerisport.az xəbər verir ki, klub rəhbərliyi iki legionerlə anlaşdıqlarını bildirsə də, ad açıqlamamışdı.
Lakin artıq onların kimliyi müəyyənləşib. Belə ki, yeni futbolçulardan biri xorvatiyalı mərkəz müdafiəçisi Duje Bakoviç, digəri isə argentinalı mərkəz yarımmüdafiəçisi Lukas Mariodu.
Duje Bakoviç 1986-cı ildə Riyekada dünyaya gəlib. “Riyeka” klubunun yetirməsi olan 25 yaşlı futbolçu karyerası ərzində bu komanda ilə yanaşı, Xorvatiyanın “Oriyent”, Yunanıstanın “Kavala” və “Egaleo” klublarında çıxış edib. 2010-cu ildə yenidən “Rijeka”ya dönən Bakoviç indiyədək 32 oyunda meydana çıxıb. O, Xorvatiyanın U-18 (3 oyun), U-19 (4 oyun) və U-21 (4 oyun) yığmalarında çıxış edib.
1985-ci ildə Bunos Ayresdə dünyaya gələn Lukas Mario Horvat gənclik karyerası ərzində vətənində “Argentinos Xuniors” və “River Playte” klublarında çıxış edib. 2004-cü ildə Sloveniyaya gələn argentinalı həmin vaxtdan bu ölkənin “Faktor”, “Drava Ptuj”, “İnterblok” və “Domjale” klublarında çıxış edib. O, “Bakı”nın yayda “Domjale”dən aldığı Juninyo ilə komanda yoldaşı olub.
Paytaxt klubunun baş meneceri Zeynal Məmmədovun sözlərinə görə, sözügedən oyunçularla artıq razılığa gəlinib. Həftə sonuna kimi onlarla müqavilə imzalanması gözlənilir. Amma bunun üçün onların hazırkı klublarıyla da problemlərini tam yoluna qoyması lazımdı.
