26 yanvar 2012 03:08
“Mövsüm öncəsi heç kim bu klubdan belə nəticə və gözəl oyun gözləmirdi”
Azerisport.az sizi “Rəvan”nın yeni transferi Vüsal Qarayevin klubun saytına verdiyi müsahibə ilə tanış edir.
- İlk öncə səni təbrik edirik. “Rəvan”da sənə uğurlar arzulayırıq. Kluba keçidin barədə məlumat verərdin...
- Çox sağ olun. Bu komandaya keçməyimə görə şadam. AZAL ilə müqaviləm dekabrda bitmişdi və mən azad agent statusu əldə etmişdim. “Rəvan” tərəfindən təklifi eşidən kimi bu komandaya keçməyi qərara aldım. Hal–hazırda klubla 1 illik müqavilə imzalamışam.
- Yeni kluba keçid, yeni mühitə keçid deməkdi. Komandaya uyğunlaşma ilə bir problemin olmadı ki?
- Düzünü desəm klubdakı oyunçuların və məşqçi heyətinin əksəriyyəti ilə çoxdan tanışam. Ona görədə komandaya uyğunlaşma çox rahat şəkildə oldu. Yalnız legioner futbolçuları tanımırdım ki, məşqlərdə artıq bütün komanda yoldaşlarım ilə yaxşı münasibətim var.
- “Rəvan” çempionatda debütantdı, ümumiyyətlə klubun çıxışlarını izləyirdin?
- “Rəvan” bu ilki çempionatda ən baxımlı futbol oynayan klublardandı. Çempionat başlayanda heç kim bu klubdan belə nəticələr və gözəl oyun gözləmirdi. Elə keçidimin əsas səbəbindən biri də bu klubun oyun üslubu və klubun çox böyük potensiala malik olmasıdı. Mən də burda bir futbolçu kimi inkişaf edə biləcəyimi düşünürəm.
- Artıq komandada 1 yoxlama görüşü keçirmisən və 2 qol vurmusan. Bu barədə ətraflı məlumat verə bilərsənmi?
- Bəli, artıq yeni komandamda qol hesabımı açmışam, 24 yanvar tarixdə Salyan şəhərində təlim-məşq toplanışı çərçivəsində “Muğan” klubu ilə yoldaşlıq oyunu keçirdik. Həmin oyuna məşqçi məni hücumçu kimi oyuna salmışdı. 6:2 hesabı ilə qalib gəldik və mən 2 dəfə fərqləndim. Əsasən sağ yarımmüdafiəçi qismində oynayıram. Lakin “Turan” və “Qəbələ” klublarında sırf hücumçu kimi çıxış etmışəm. Onə görə də mən bu mövqedə çıxış etmək mənə yad deyil.
