26 yanvar 2012 15:12
Baş məşqçinin biri getdi, digəri gəldi (FOTO)
Futbol üzrə Türkiyə Superliqasında çıxış edən “Gaziantepspor”da baş məşqçi dəyişikliyi baş verib. Azerisport.az xəbər verir ki, komandanın sabiq baş məşqçisi Abdullah Ercan bu gün istefa ərizəsini yazıb.
Onunla yollarını ayıran klub rəhbərliyi dərhal yeni baş məşqçisini də açıqlayıb. Belə ki, Abdullah Ercanın yerinə Hikmet Karaman gətirilib.
Xatırladaq ki, Abdullah Ercan mövsümün əvvəlində Tolunay Kafkasın yerinə gətirilmişdi. Onun rəhbərliyi altında “Gaziantepspor” 18 matçda 5 qələbə, 5 məğlubiyyət və 8 heç-heçəyə nail olub.
Komanda hazırda 23 xalla 15-ci pillədə qərarlaşıb.
Sonda onu da vurğulayaq ki, Türkiyə Superliqasında son günlərdə artıq 3 istefa gerçəkləşib. Öncə “Samsunspor” Vladimir Petkoviçlə yollarını ayırmağa qərar vermişdi. Hələlik onun əvəzləyicisinin kim olacağı bilinmir. Dünən isə “Manisaspor”un sükanı arxasından gedən Kemal Özdeşi bu gün Ümit Özat əvəzlədi.
