30 yanvar 2012 16:48
Neftçinin oyunlarının yayımlanmamasının səbəbi açıqlandı
Türkiyənin Antalya şəhərində Çeçenistan Respublikasının mərhum prezidenti Əhməd Kadırovun xatirəsinə həsr olunmuş beynəlxalq turnirin "İdman Azərbaycan" telekanalı vasitəsilə canlı yayımlanmaması böyük qalmaqala səbəb olub. Azerisport.az xəbər verir ki, “Neftçi” klubu rəsmi saytı vasitəsilə bu barədə yeni məlumat yerləşdirib.
Həmin məlumatı təqdim edirik: “Türkiyənin Antalya şəhərində Çeçenistan Respublikasının mərhum prezidenti Əhməd Kadırovun xatirəsinə həsr olunmuş beynəlxalq turnirin "İdman Azərbaycan" telekanalı vasitəsilə canlı yayımlanmaması səbəbləri "Neftçi" PFK-nın bəyanatında öz əksini tapmışdı. Adı çəkilən telekanal isə öz növbəsində bəyanat yaymış və canlı yayımın baş tutmaması səbəblərini təhrif etmişdir. Telekanalın bəyanatında deyilir ki, yarışı təşkil edən "Enda Sports& Media" şirkətinin nümayəndəsi Metin Dalman bildirib ki, "Neftçi"nin oyunlarına maraq olmadığına və klubun turnirdə zəif komandalardan biri olduğuna görə paytaxt təmsilçisinin heç bir oyunundan canlı yayım təşkil olunmayacaq. Üstəlik bəyanatda "Neftçi"PFK-nın mətbuatla işinin peşəkar səviyyədə qurulmadığı qeyd olunur.
"Neftçi" PFK olaraq məsələyə aydınlıq gətirmək üçün klubumuzun Türkiyəyə ezam olunmuş əməkdaşları yarışı təşkil edən "Enda Sports& Media" şirkətinin nümayəndəsi Metin Dalmanla görüşüb. Mətin bəy "İdman Azərbaycan" telekanalının ona istinadən yazdığı fikirləri tam təkzib edib. "Neftçi" bu turnirin ən iddialı komandalarından biridir. Əgər "Neftçi" zəif komanda olsaydı yarışa dəvət olunmazdı. Bu klubun oyunları turnirə rəng qatır. O ki, qaldı yayımın baş tutmamasına, bunun səbəbi sadədir. Bu yarışın təşkilatçiları Rusiyanın "Terek" klubunun oyunlarını və final görüşünün yayımlamaq üçün bizimlə anlaşıblar. "İdman Azərbaycan" telekanalından da bizə müraciət olunanda bildirdik ki, "Neftçi"nin oyunlarını yayımlamaq üçün ayrıca texniki avadanlıq sifariş edilməlidir. Hətta telekanallara yayımın siqnalını çox sərfəli qiymətə təşkil etməyin mümkün olduğunu demişəm. Biz yayımçı şirkət olaraq "İdman Azərbaycan" telekanalına yayım üçün müəyyən məbləğdə vəsaitin tələb olunduğunu bildirdik. Bundan sonra telekanaldan bizə cavab gəlmədi və yayım baş tutmadı. Qeyd edim ki, turnirdə mübarizə aparan "Rapid" Buxarest klubunun görüşlərini Rumıniyanın "Digisport" telekanalı və "Paxtakor" komandasının görüşlərini isə Özbəkistan dövlət televiziyası yayımlamaq üçün bizə sifariş göndərib və biz onlarla razılığa gəlmişik. Başqa səbəb axtarmaq lazım deyil və mənim adımdan fikirlərimi "İdman Azərbaycan" telekanalı tərəfindən yanlış yazıldığına təəssüf edirəm. Mobil nömrəm də budur, +90 533 305 85 83. İstənilən adam istənilən vaxt zəng edib əmin ola bilər ki, belə bir şey deməmişəm, deyə Metin Dalman bildirib. Sonda isə Metin Dalman bir daha xatırladıb ki, hələ də gec deyil və "İdman Azərbaycan" telekanalı bizə sifariş göndərib "Neftçi" PFK-nın qalan oyunlarını yayımlaya bilər.
"Neftçi" PFK olaraq "İdman Azərbaycan" telekanalını hansısa qərəzli mövqe tutmaqda günahlandırmırıq. Sadəcə olaraq telekanal yayımın təşkilinə qeyri- peşəkar yanaşıb və buna görə flaqman azarkeşlərinə üzrxahlığını bildirməlidir. Öz növbəmizdə bir daha bəyan edirik ki, "Neftçi"nin beynəlxalq oyunlarının yayımlanması üçün istənilən telekanala hərtərəfli köməklik göstərməyə hazırıq”.
