1 fevral 2012 14:24
Bakı La Liqadan futbolçu gətirir
“Bakı” şok transfer həyata keçirməyə hazırlaşır. Azerisport.az xəbər verir ki, paytaxtın eyniadlı klubu ispaniyalı hücumçu Serxio Kontrerası heyətinə qatmağa çalışır.
Qeyd edək ki, “Koke” ləqəbli futbolçu cari mövsümə İspaniya La Liqasında çıxış edən “Rayo Vallecano”da başlayıb. Lakin qışda tərəflər qarşılıqlı razılıq əsasında yollarını ayırıblar. Bu üzdən hazırda Kontreras azad agent statusuna malikdi.
“Bakı”nın baş meneceri Zeynal Məmmədov bu məlumatları saytımıza açıqlamasında təsdiqləyib: “Bəli, biz bu futbolçu ilə maraqlanırıq. Hazırda danışıqlarımız davam edir”.
Qeyd edək ki, Kontreras karyrasına “Malaga”da başlayıb. Burda 6 oyuna 1 qol vuran futbolçu 2004–2006-cı illər aralığında Fransanın “Olympique” (Marsel) klubunda çıxış edib. O, sözügedən ölkədə 43 oyuna 6 top vurub. 2006-cı ildə isə Portuqaliyanın “Sporting” klubuna (6 oyun, 2 qol) icarəyə gedib.
Koke karyerasının böyük hissəsini 2006–2011-ci illər aralığında Yunanıstanın “Aris” klubunda keçirib. O, burda 132 oyuna 28 qola imza atıb. Ötən il Kontreras ABŞ çempionatında çıxış edən “Houston Dynamo”ya da keçib və 7 oyunda 1 qol vurub. Onun son klubu “Rayo Vallecano”dakı karyerası isə 5 oyun, 1 qolla məhdudlaşıb.
İspaniyalı forvardı “Bakı” ilə yanaşı Polşa “Legia”sı da öz sıralarından görmək istəyir. Paytaxt klubunun artıq argentinalı Lukas Mario Horvat, xorvatiyalı Duje Bakoviç və serbiyalı Nenad Kovaçeviçi heyətinə qatdığını da xatırladaq.
