Andrey Tveryankin: Portuqaliyanı qələbə ilə təəccübləndirəcəyik

Futzal üzrə Azərbaycan yığmasının qapıçısı Andrey Tveryankin azerisport.az saytına müsahibəsində milli komandamızın Avropa çempionatındakı şanslarını dəyərləndirib.

 

- Sizcə, yığmamız AÇ-nin əsas favoritlərindən birinə - Portuqaliyaya qarşı oyuna hazırdı?

- Komandamızın son dövrlərdəki oyunlarının o qədər də parlaq alındığını demək olmaz. Amma biz sonuncu seçmə mərhələdə qarşıya qoyulan vəzifənin öhdəsindən gələ bildik. Lakin həmin oyunlara görə hazırda komandada hansısa pessimistlik yoxdu. Hər şey bizim əlimizdədi. Hazırda normal vəziyyətdəyik. Portuqaliya ilə yenidən oynamağa hazırıq.

 

- Azərbaycanın bu komanda üzərində qələbə qazanmasına çox az adam inanır…

- Biz bu haqda düşünmürük. Meydana çıxıb, nəyə qadir olduğumuzu göstərmək istəyirik.

 

- Bu oyun ərəfəsində AÇ-2010-dakı çıxışımızı yada salmamaq olmur. Həmin qitə birinciliyində bu iki komanda yarımfinalda üz-üzə gəlmişdi. Yığmamız rəqibinə sadəcə penalti seriyasında uduzmuşdu. O dövrlə müqayisədə Portuqaliya daha güclənib. Biz isə əksinə, öz mövqelərimizi əldən veririk. Bütün bunlar komandaya mənfi təsir göstərmir?

- Mən təbiətcə pessimist insan deyiləm. Əgər məndə elə düşüncə olsaydı, bu, heç kimə yaxşı nəsə verməzdi. Ola bilər ki, portəgizlər vavoritdilər. Razıyam ki, həmişə güclü olan qələbə qazanır. Amma görüşün necə bitəcəyini heç onlar özləri də deyə bilməzlər. Hər şeyi oyun göstərəcək.

 

- Portuqaliyanı bu dəfə nə iləsə təəccübləndirməyi düşünürsüz?

- Qələbə ilə təəccübləndirəcəyik (gülür). Öz adi oyunumuzu sərgiləməyi düşünürük. Amma konkret necə oynayacağıq, hücuma, yoxsa əks-hücumlara üstünlük verəcəyimizi baş məşqçi müəyyənləşdirəcək.

 

- Artıq indidən hamı yığmamızın əsas gücü Serbiya ilə oyuna yönəldəcəyini düşünür…

- Hesab edirəm ki, qrupumuzdakı bütün komandaların şansları bərabərdi. Serblər də bizim kimi, Portuqaliyanı məğlub edə bilərlər. Hələ nəyin necə olacağı heç kimə bəlli deyil.

 

- Komandamızın qarşısına artıq hansısa hədəf qoyulub?
- Hələ bizə heç kim heç nə deməyib. Hələ ümumi toplantımız olmayıb. Amma güman ki, hədəfsiz ötüşməyəcək. Fikrimcə, əsas məqsəd qrupdan çıxmaqdan ibarətdi.