1 fevral 2012 00:38
Neftçi finala çıxa biləcəkmi?
Xəbər verdiyimiz kimi, hazırda Türkiyənin Antalya şəhərində Çeçenistan Respublikasının ilk prezidenti Əhməd Kadırovun xatirəsinə həsr olunmuş beynəlxalq futbol turniri keçirilir. Azerisport.az xəbər verir ki, Azərbaycanı sözügedən turnirdə son ölkə çempionu “Neftçi” təmsil edir.
“Ağ-qaralar” Ukraynanın "Metallist" (Xarkov), Polşanın "Poloniya" və Özbəkistanın "Paxtakor" klubları ilə birgə B qrupunda yer alıb. "Neftçi" ilk oyununda “Metallist”lə üz-üzə gəlmiş və meydandan məğlub ayrılmışdı – 1:3. “Poloniya” ilə görüşdə isə “ağ-qaralar” eyni hesabla qələbə qazanmışdılar – 3:1.
Bu gün isə Böyükağa Hacıyevin yetirmələri “Paxtakor”la münasibətlərinə aydınlıq gətirəcək. Hansı ki, bu komanda ilk oyununda “Poloniya”ya 1:2 hesabıyla yenilmişdi. Lakin ardından “Metallist”ə qalib gəlmişdi (1:1, penaltilərlə 3:2).
Qeyd edək ki, hazırda bütün komandaların eyni xalı (3) var və hər birinin finala çıxmaq şansı qalmaqdadı. “Neftçi” həlledici oyuna vəsiqə qazanmaq üçün Özbəkistan klubunu mümkün qədər fərqli hesabla yenməli, yeni zamanda “Metallist”in “Poloniya”ya məğlubiyyətini arzulamalıdı.
Yeri gəlmişkən, öncədən nəzərdə tutulan plana əsasən “Neftçi”nin Özbəkistan “Paxtakor”u ilə görüşü Türkiyə vaxtı ilə saat 11:00-da (Bakı vaxtı ilə 13:00) başlayacaqdı. Qrupun digər oyunu - “Metallist” (Xarkov, Ukrayna) – “Poloniya” (Polşa) görüşü isə bundan xeyli sonra (16:00-da) start götürməliydi. Lakin “Neftçi” rəhbərliyi turnirin təşkilat komitəsinə müraciət edərək, hər iki oyunun eyni vaxtda keçirilməsinin daha ədalətli olacağını bildirib. Qarşı tərəf bu müraciəti müsbət cavablayıb və qarşılaşmaların hər ikisinin Bakı vaxtı ilə saat 17:00-da başlamasına qərar verib.
Beynəlxalq turnir
Qrup mərhələsi
B qrupu
1 fevral
17:00. Neftçi – Paxtakor
