4 fevral 2012 14:38
Təxirə salınmış oyunların keçirilmə vaxtları açıqlandı
Futbol üzrə İtaliya A Seriyasında təxirə salınmış oyunların keçiriləcəyi tarix müəyyənləşib. Azerisport.az xəbər verir ki, 21-ci turun yanvarın 31-də və fevralın 1-də oynanılmalı olan, lakin əlverişsiz hava şəraiti səbəbindən təxirə salınan görüşləri elə bu ay keçiriləcək.
Belə ki, “Atalanta” – “Genoa” və “Parma” – “Juventus” görüşləri fevralın 15-də oynanılacaq. Fevralın 21-də “Bologna” – “Fiorentina” matçı baş tutacaq. Ayın 22-də isə sözügedən tura “Siena” – “Catania” görüşü ilə yekun vurulacaq. Bütün görüşlərin Bakı vaxtı ilə 21:30-da start götürməsi planlaşdırılır.
Xatırladaq ki, yuxarıda göstərilən bütün görüşlərin təxirə salınmasına İtaliyaya yağan güclü qar səbəb olmuşdu. Eyni səbəbdən bu gün oynanılmalı olan 22-ci turun 2 görüşü də təxirə salınıb. Lakin “Roma” – “İnter” matçı sabaha keçirilib və oynanılması gözlənilir. “Cesena” – “Catania” qarşılaşmasının nə vaxt keçiriləcəyi isə hələlik dəqiqləşməyib.
