4 fevral 2012 12:28
“Bu, komandamıza böyük zərbədi”
Futzal üzrə Azərbaycan yığmasının üzvü Rizvan Fərzəliyev komandamızın AÇ-2012-nin qrup mərhələsindəki uğursuz çıxışına münasibətini açıqlayıb. Azerisport.az saytına müsahibəsində o, bunları dilə gətirib.
“Biz AÇ-2010-da yaxşı uğur qazanmışdıq. Onda yarımfinala çıxmaqla tarix yazmışdıq. Belə uğurdan sonra indi startdaca qitə çempionatıyla vidalaşmağa inana bilmirəm. Mən bunu faciə yox, uğursuzluq adlandırardım. Bu, komandamıza böyük zərbədi. Yerli – xorvatiyalı azarkeşlərin bizə bu cür dəstək verməsi çox xoş idi. Bilirdik ki, Xorvatiya ilə Serbiya arasındakı münasibətlər o qədər də yaxşı deyil. Amma bu oyunda sanki evdə oynadığımızı hiss edirdik. Təəssüf ki, bundan yararlana bilmədik. Apreldə bizi dünya çempionatının pley-off matçları gözləyir. Ruhdan düşməyib, həmin oyunlara hazırlaşmalıyıq. Çalışacağıq ki, ilk dəfə dünya çempionatına vəsiqə qazanaq”.
Qeyd edək ki, Portuqaliya və Serbiya ilə eyni qrupda yer alan Azərbaycan millisi bu rəqiblərinin hər ikisinə məğlub olaraq (müvafiq olaraq 1:4 və 8:9) AÇ-2012 ilə erkən vidalaşdı.
