8 fevral 2012 13:01
PFL bütün turnirləri təxirə saldı
Futbol üzrə Azərbaycan Premyer Liqasında 19-cu turun bütün oyunları təxirə salınıb. Azerisport.az xəbər verir ki, artıq Peşəkar Futbol Liqasının prezidenti Ramin Musayev bu barədə müvafiq əmr də imzalayıb.
Bu barədə qurumun rəsmi saytı məlumat yayıb. Məlumatda bildirilir ki, buna səbəb əlverişsiz hava şəraitidi.
Qeyd edək ki, 19-cu tura fevralın 10-da 2 görüşlə start verilməli, daha 4 matç isə ertəsi gün keçirilməli idi. İlk oyun günündə AZAL (Bakı) – “Sumqayıt” və “Qarabağ” (Ağdam) – “Simurq” (Zaqatala), ertəsi gün isə “Turan” (Tovuz) – “Xəzər Lənkəran”, “Kəpəz” (Gəncə) – “Qəbələ”, “İnter” (Bakı) – “Rəvan” (Bakı) və “Bakı” – “Neftçi” (Bakı) matçları nəzərdə tutulmuşdu. Lakin bu oyunlardan heç biri baş tutmayacaq.
Təxirəsalma yalnız Premyer Liqaya aid deyil. Belə ki, PFL Azərbaycan kubokunun 1/4 final mərhələsinin ilk və cavab oyunlarının, həmçinin birinci divizionun 16-cı turunun da təxirə salınmasına qərar verib.
Bununla bağlı müvafiq qərarda bildirilir:
Premyer Liqanın 19-cu turunun bütün görüşləri 10-11 fevral 2012-ci il tarixindən 7 mart 2012-ci il tarixinə keçirilsin.
Azərbaycan kubokunun 1/4 final ilk oyunları 7-8 mart 2012-ci il tarixindən 13-14 mart 2012-ci il tarixinə keçirilsin.
Azərbaycan kubokunun 1/4 final cavab oyunları 13-14 mart 2012-ci il tarixindən 28-29 mart 2012-ci il tarixinə keçirilsin.
Birinci divizionun 16-cı turunun bütün görüşləri 11-12 fevral 2012-ci il tarixindən 28-29 mart 2012-ci il tarixinə keçirilsin.
