9 fevral 2012 19:45
Xəzər Lənkərandan daha 2 transfer!
“Xəzər Lənkəran” Futbol Klubu bu gün Kosta-Rika millisinin hücumçusu Rendal Brenesin transfer məsələsini rəsmən həll edib. Azerisport.az xəbər verir ki, futbolçu cənub klubuyla 2 il müddətini əhatə edən müqavilə imzalayıb.
28 yaşlı Rendal Moya Brenes karyerası boyu doğma ölkəsində və həmçinin Norveç çempionatında çıxış edib. Hücumçu 2005-2008-ci illərdə Skandinaviya ölkəsinin “Bodo Qlimt”, 2008-2009-cu illərdə “Konqsvinger” klublarının şərəfini qoruyub.
2010-cu ildən etibarən isə oyunçu ölkəsinin “Kartagines” klubunda top qovub. “Xəzər Lənkəran”a məhz “Kartagines”dən keçən Rendal cari mövsümdə 21 oyuna çıxmaqla 14 dəfə fərqlənməyi bacarıb.
Brenes həmçinin ötən il mütəmadi olaraq Kosta-Rika milli komandasının sıralarına da çağırılıb. Belə ki, futbolçu 2011-ci il ərzində CONCACAF Kubokunda 2 oyun, Mərkəzi Amerika Kubokunda 4 oyun və Copa America turnirində 2 oyunda meydana çıxıb. CONCACAF Kubokunda 1 qol vurmuş yeni transfer həmçinin ötən il 8 yoldaşlıq görüşündə forma geyinməklə, bu oyunlarda daha 2 dəfə fərqlənməklə yadda qalıb. 16 noyabr 2011-ci ildə Kosta-Rika millisinin dünya çempionu İspaniyaya qarşı keçirdiyi oyunda hesabı da məhz Rendal açmışdı.
Bundan əlavə qeyd edək ki, "Xəzər Lənkəran" Futbol Klubu Türkiyənin "Beşiktaş" klubunda çıxış edən yarımmüdafiəçi Mehmet Akyüzün icarə əsasında keçidini razılaşdırıb. Yaxın zamanda türk futbolçunun da komandanın sıralarına qoşulacağı gözlənilir.
