10 fevral 2012 19:56
Bakı - Qarabağ matçının vaxtı açıqlandı
Peşəkar Futbol Liqasının ölkə ərazisində hökm sürən ağır hava şəraiti ilə əlaqədar çempionatın təqvimində dəyişiklər etdiyi barədə məlumat vermişdik. Azerisport.az xəbər verir ki, 19-cu turun qarşılaşmalarının təxirə salınmasından sonra “Bakı”nın da hazırlıq planlarında dəyişikliklərə səbəb olub.
Hazırda komanda "Qarabağ"la oyuna klubun təlim-məşq bazasında hazırlaşır. Bu gün bazanın qapalı meydanında məşqə çıxan futbolçuların istəkli olduğu diqqətləri çəkib. Zədəli futbolçulardan İbrahim Karqbo və Elvin Əliyev fərdi məşq keçib. Komanda isə zalda bir araya gəlib.
Aleksandr Starkov və köməkçiləri əzmkarlıqla çalışan oyunçuların fərdi hazırlığına xüsusi diqqət yetirib. Qızınma hərəkətlərinin ardından topla məşğələlərə keçən futbolçular 90 dəqiqəlik məşqi yüksək əhval-ruhiyyə ilə başa vurublar.
Bir daha xatırladaq ki, təqvimdə yer alan dəyişikliklərə əsasən, komanda 15 fevral 2012-ci il tarixdə "Qarabağ"ı qəbul edəcək. Klubun təlim-məşq bazasının stadionunda baş tutacaq oyunun start fiti saat 14:00-də səslənəcək.
