13 fevral 2012 14:20
Sergey Yuran: Dubaya getməyəcəm
“Simurq”un baş məşqçisi Sergey Yuran da futbol üzrə Azərbaycan yığmasının Birləşmiş Ərəb Əmirliklərində keçiriləcək toplanışına qatılmayacaq. Azerisport.az xəbər verir ki, millimizin baş məşqçisi Berti Foqts Premyer Liqada çıxış edən klubların baş məşqçilərinin də Dubay toplanışında iştirak etməsini istəyir.
Bununla əlaqədar AFFA bütün klubların çalışdırıcılarına dəvət də göndərib. Amma “Simurq”un rusiyalı məşqçisi klubdakı işlərinin çoxluğunu səbəb gətirərək, Dubaya getmək istəmir:
“Mən Dubaya getməyəcəm. Mən də orda özümü günə vermək istərdim. Amma işlərimiz çoxdu. AFFA-ya və Berti Foqtsa dəvətə görə minnətdarlığımı bildirirəm. Bütövlükdə, bu, yaxşı ideyadı. Başqa vaxt olsaydı, məmnuniyyətlə gedərdim. Lakin bir baş məşqçi kimi mən komandamın yanında olmalıyam. Çünki martın 3-də növbəti oyunumuz olacaq”.
Qeyd edək ki, fevralın sonundan başlayacaq bu səfər martın 2-də başa çatacaq. Ayın 3-də isə Premyer Liqanın oyunları keçiriləcək. Xatırladaq ki, Yurandan öncə “Qarabağ”ın baş məşqçisi Qurban Qurbanovla “Qəbələ”nin türkiyəli çalışdırıcısı Fatih Kavlak da Dubaya getməyəcəyini bəyan edib. Digər məşqçilərin də oxşar səbəblərdən sözügedən dəvəti qəbul etməyəcəyi gözlənilir.
