13 fevral 2012 14:51
Aleksandr Starkov Berti Foqtsun dəvətini qəbul etmədi
“Bakı”nın baş məşqçisi Aleksandr Starkov da futbol üzrə Azərbaycan yığmasının Birləşmiş Ərəb Əmirliklərində keçiriləcək toplanışına qatılmayacaq. Azerisport.az xəbər verir ki, millimizin baş məşqçisi Berti Foqts Premyer Liqada çıxış edən klubların baş məşqçilərinin də Dubay toplanışında iştirak etməsini istəyir.
Bununla əlaqədar AFFA bütün klubların çalışdırıcılarına dəvət də göndərib. Amma paytaxt klubunun məşqçisi işlərinin çoxluğunu səbəb gətirərək, Dubaya getmək istəmir.
Qeyd edək ki, fevralın sonundan başlayacaq bu səfər martın 2-də başa çatacaq. Ayın 3-də isə Premyer Liqanın oyunları keçiriləcək. Starkovdan öncə “Qarabağ”ın baş məşqçisi Qurban Qurbanov, “Qəbələ”nin türkiyəli çalışdırıcısı Fatih Kavlak, “Turan”dan Əsgər Abdullayev, həmçinin “Simurq”dan Sergey Yuran Dubaya getməyəcəyini bəyan edib.
