13 fevral 2012 20:06
XL azarkeşlərinə sürpriz
Futbol üzrə Azərbaycan Premyer Liqasında 20-ci turun “Xəzər Lənkəran” – AZAL matçının keçiriləcəyi Lənkəran şəhər mərkəzi stadionunda azarkeşlər üçün sürpriz hazırlanıb. Azerisport.az arenanın direktoru Höccət Hacıyevə istinadən xəbər verir ki, fevralın 15-də saat 16:00-da başlanacaq qarşılaşmadan öncə 17 yaşadək qızlar arasında dünya çempionatının loqosu təqdim ediləcək.
Amma həmin loqo kağız üzərində təsvirdən ibarət olmayacaq. Onu xüsusi hazırlıq keçmiş 130 nəfərədək uşaq meydançada nümayiş etdirəcək. Bu da səbəbsiz deyil. Sentyabrın 22-də start götürəcək dünya çempionatının oyunları üçün nəzərdə tutulan arenalardan biri Lənkəran şəhər mərkəzi stadionudur. Bununla əlaqədar cənub şəhərinə AFFA rəsmiləri də yollanacaqlar.
Qeyd edək ki, dünya çempionatının loqosu “Xəzər Lənkəran” – AZAL matçından 10 dəqiqə öncə təqdim olunacaq. (lent.az)
