14 fevral 2012 18:16
Premyer Liqa, 20-ci tur: Əfqan Talıbovun proqnozu
Futbol üzrə Azərbaycan Premyer Liqasının 20-ci turunun startı ərəfəsində Əfqan Talıbov azerisport.az saytına müsahibəsində komandaların şanslarını dəyərləndirib.
Sumqayıt – Neftçi
Şübhəsiz ki, bu görüşdə paytaxt klubu favoritdi. Böyükağa Hacıyevin yetirmələri yaxşı hazırlıq keçiblər. Onlar fasilədən sonrakı ilk oyunlarında qələbə qazanmaq istəyəcəklər. Çünki mümkün xal itkisi mövsümün qalan hissəsində mənfi təsirini göstərə bilər. Debütanta gəlincə ötən il onlar yaxşı sürət yığmışdılar. Fikrimcə, “Sumqayıt” bu görüşdə rəqibinə ciddi müqavimət göstərə biləcək. Amma “Neftçi”nin minimal hesabla da olsa, qələbə qazanacağını düşünürəm.
Xəzər Lənkəran – AZAL
“Təyyarəçilər”in ölkə xaricinə yollanmamasını, normal təlim-məşq toplanışını keçirmədiyini, transfer bazarındakı zəif işini nəzərə alsaq, bu komandanın şansları o qədər də yüksək deyil. Baxayaraq ki, Lənkəranda sensasiyanın baş verməsini də istisna etmirəm. AZAL həmişə sürpriz komanda olub. Lakin mən qələbənin “Xəzər Lənkəran”a qismət olacağı qənaətindəyəm.
Bakı – Qarabağ
Hər iki komanda bu mövsümə ciddi hazırlaşıblar. Heç birində hansısa kadr problemi qalmayıb. Əminəm ki, ilk yarı ehtiyatlı oyunla müşaiyət olunacaq. Komandalar əks-hücum futboluna üstünlük verirlər. Məncə, heç-heçə olmalıdı.
Rəvan – Turan
Baş məşqçi dəyişikliyindən sonra “Rəvan”ın hansı durumda olması qaranlıq alır. “Turan”da ümumiyyətlə qlobal problemlər hökm sürür. Bütün bunlara rəğmən, meydanda ciddi mübarizənin gedəcəyini düşünürəm. Bu mübarizədən “Rəvan” qalib ayrılacaq.
Simurq – Qəbələ
Maraqlı qarşıdurma olacaq. Nəzərə alsaq ki, “Simurq” rəqibini doğma meydanda qəbul edəcək, onda şansların bərabər olduğunu demək olar. “Qəbələ”yə ilk altılığa düşmək yolunda xal itirmək olmaz. Qəbələlilər üçün bu matç dönüş nöqtəsi də ola bilər. Bu oyunda da heç-heçə olacağını düşünürəm.
Kəpəz – İnter
“Kəpəz”ə çempionatın liderlərindən olan komandadan xal almaq çətin olacaq. “İnter” təkcə bu oyunda 3 xal qazanmaqla kifayətlənməyib, “Neftçi”nin də xal itkisini arzulayacaq. Belə olsa, bu komandanın qələbə qazanması daha real görünür. “Bankirlər”in minimal hesablı qələbəsini proqnozlaşdırıram.
