15 fevral 2012 17:03
Böyükağa Hacıyev: İlk pillədəki mövqeyimizi qorumaq üçün buna borcluyuq
“Neftçi”nin baş məşqçisi Böyükağa Hacıyev Premyer Liqanın 20-ci turunun “Sumqayıt”la oyununu şərh edib. Azerisport.az xəbər verir ki, paytaxt klubunun çalışdırıcısı 3:0 hesabıyla qələbə qazandıqları görüşdən sonra bunları dilə gətirib:
“Çox maraqlı oyun oldu. Birinci dövrədəki “Sumqayıt” komandasından əsər-əlamət qalmayıb. Məşqçi işi göz qabağındadır. “Neftçi” kimi güclü komanda ilə layiqli mübarizə apardılar. “Sumqayıt”ın bu gün təcrübəsi çatmadı. Onlar bizi əks-hücumlarda yaxalasalar da, fərqlənə bilmədilər. “Sumqayıt”, yəqin ki, çox komandaya baş ağrısı olacaq. Həmkarıma uğurlar arzulayıram. Bizə gəlincə, həmişə olduğu kimi, bu oyuna da qələbə qazanmaq üçün çıxmışdıq. Biz erkən qol vurmaqda çətinlik çəkdik. Amma sonradan üstünlüyə yiyələndik və hesabı açdıq. Nəticədə, 3 cavabsız qol vurduq. Qarşıdakı oyunlarda da qələbə qazanmaq istəyirik. İlk pillədəki mövqeyimizi qorumaq üçün buna borcluyuq”.
