16 fevral 2012 16:37
XL üçün 141-ci futbolçu, 15-ci debütant, 32-ci ölkə
Azərbaycan Premyer Liqasının 20-ci turu 2 futbolçunun “Xəzər Lənkəran”da debüt etməsi ilə əlamətdar oldu. Azerisport.az xəbər verir ki, xorvatiyalı Roberto Alviz və malili Sadio Tounkara karyeralarında ilk dəfə bu komandanın formasında meydana çıxdılar.
AZAL-la ev matçında iştirak edən yarımmüdafiəçilər “Xəzər Lənkəran” tarixinin bütün oyunçularının ümumi sayını artırdı. Bu matçadək 139 futbolçuya ağ-yaşıl formada rəsmi matça çıxmaq nəsib olmuşdusa, 61-ci dəqiqədə komanda yoldaşını əvəzləyən Alviz 140-cı, ondan 7 dəqiqə az oynayan Sadio 141-ci oldu.
Bununla da 2011/12 mövsümündəki debütantların sayı 15-ə çatdı. Onlara qədər Eder Bonfim, Rikardo Qomeş, Joao Paulo, Çaba Borbeli, Marius Onofraşa, Dejan Rusiç, Branimir Subaşiç, Mario Rosas, Antonio Semedo, Eldar İsmayılov, Kamal Bayramov, Habil Nurəhmədov və Zahid Quliyev də yeni komandalarında debüt etmişdilər.
Komandanın şərəfini qorumuş 141 oyunçudan 55-i yerli, 86-sı əcnəbidi. Sonuncu rəqəmin 86-ya çatmasında Alvizlə Tounkaranın da rolu olub. Belə ki, xorvatiyalı 85-ci, malili 86-cı olub. Onların hər ikisi öz ölkəsinin bu klubdakı ilk təmsilçisi kimi də tarixə düşüb. Belə ki, indiyədək “Xəzər Lənkəran”da oynamış legionerlər arasında Xorvatiya və Mali vətəndaşı olmamışdı. Bununla da komandada təmsil olunan ölkələrin sayı da 32-yə çatdı: Rumıniya – 18, Braziliya – 10, Türkiyə - 9, Serbiya – 6, Belarus - 5, Bolqarıstan, Portuqaliya – hərəsi 4, Albaniya, Gürcüstan, Kolumbiya, Litva, Rusiya – hərəsi 2, Çexiya, Estoniya, Fransa, Honduras, İsveç, Kot d’ivuar, Moldova, Nigeriya, Qana, Slovakiya, Argentina, Kosta-Rika, Latviya, Syerra-Leone, Qvineya, Ukrayna, Sloveniya, İspaniya, Xorvatiya, Mali – hərəsi 1.
