18 fevral 2012 17:26
Amit ehtiyatda qaldı, komandası xal itirdi (YENİLƏNİB)
Bu gün Türkiyənin Bank Asya birinci liqasında 22-ci turun oyunları keçirilib. Azerisport.az xəbər verir ki, millimizin yarımmüdafiəçisi Amit Quluzadənin çıxış etdiyi “Erciyesspor” da bu gün növbəti oyununa çıxıb.
Həmyerlimizin komandası evdə “Karşıyaka” ilə qarşılaşıb. Qeyd edək ki, bu oyun öncəsində “Erciyesspor” 29 xalla 7-ci pillədə qərarlaşmışdı. Kayseri təmsilçisi son dövrlərdəki uğursuz çıxışına son qoymaq üçün bu rəqibini məğlub etməyə borcluydu. Çünki “Karşıyaka” da 29 xalla 9-cu pillədə qərarlaşdığından, altı xallıq oyunda qələbə çox vacib idi.
Lakin kayserililər bu vəzifənin öhdəsindən gələ bilməyiblər. Meydan sahibləri hesabı açdıqları oyunda qələbəni son dəqiqələrdə əldən veriblər. Bu nəticədən sonra "Erciyesspor" 30 xalla 7-ci pillədə gedir.
Son oyunlarda az forma geyən Amitin bu dəfə hansı aqibəti yaşayacağı maraqla gözlənilirdi. Bu dəfə də futbolçumuz oyuna ehtiyat oyunçular skamyasında başlayıb. Baş məşqçi Kemalettin Şentürk Quluzadəyə şans verməyib.
Türkiyə Bank Asya birinci liqası
22-ci tur
18 fevral
Erciyesspor – Karşıyaka - 1:1 (0:0)
Qollar: Emrah Bozkurt, 76 - Özgürcan Özcan, 87.
