20 fevral 2012 11:09
Premyer Liqa, 21-ci tur: Mirbağır İsayevin proqnozu
“Kəpəz”in sabiq baş məşqçisi Mirbağır İsayev Premyer Liqanın 21-ci turu ərəfəsində azerisport.az saytı üçün komandaların şanslarını dəyərləndirib.
İnter – Sumqayıt
Fikrimcə, biz meydanda maraqlı mübarizənin şahidi olacağıq. Məlum olduğu kimi, “bankirlər” çempionluğa oynayırlar. Bu oyuna öz mövqelərini möhkəmləndirmək üçün çıxacaqlar. Rəqib düşərgədə isə sadəcə elitada qalmaq vəsifəsindən söhbət gedə bilər. Hesab edirəm ki, bu görüşün taleyini bir qol həll edəcək. “İnter”in qələbəsinə üstünlük verirəm.
Simurq – Bakı
“Bakı”nın “Qarabağ”a qarşı son oyunu daha yaxşısını arzulamağa məcbur edirdi. Mümkündü ki, komandanın hazırlığı o qədər də yüksək səviyyədə deyil. Yaxud bu, fasilədən sonrakı sıradan bir xal itkisiydi. “Simurq”un fasilədən sonrakı oyununu görməmişəm. Ona görə də dəqiq proqnoz vermək çətindi. Fikrimcə, komandaların şansları 50-nin 50-yədi.
Qarabağ – Kəpəz
Yenidən “Bakı” – “Qarabağ” oyununa qayıdaraq qeyd etməliyəm ki, Ağdam klubunun həmin matçda sərgilədiyi futbol çox yaxşı təsir bağışladı. Bu oyunda da “Qarabağ”ın qələbəsini proqnozlaşdırıram. Özü də inamlı qələbə qazanmalıdılar. Hər halda bu komandanın necə futbol oynadığının hamımız şahidiyik.
Qəbələ - Xəzər Lənkəran
Mən “Xəzər Lənkəran”ın son oyununu görmüşəm, yaxşı oynadılar. “Qəbələ”nin 20-ci turdakı oyununu görməsəm də, onlar səfərdə “Simurq”u çətinliklə də olsa, məğlub edə bildilər. Lakin mərkəzi oyunda “Xəzər Lənkəran”ın qələbə şanslarını daha yüksək qiymətləndirirəm.
Mən “Xəzər Lənkəran”ın son oyununu görmüşəm, yaxşı oynadılar. “Qəbələ”nin 20-ci turdakı oyununu görməsəm də, onlar səfərdə “Simurq”u çətinliklə də olsa, məğlub edə bildilər. Lakin mərkəzi oyunda “Xəzər Lənkəran”ın qələbə şanslarını daha yüksək qiymətləndirirəm.
AZAL – Turan
Sirr deyil ki, “Turan” bu mövsüm ciddi problemlərlə üzləşib. Komandadakı böhran futbolçulara da təsirsiz ötüşmür. Amma mən deməzdim ki, AZAL asan qələbə qazanacaq. Əlbəttə, “təyyarəçilər” daha komplekləşmiş heyətə malikdilər. Buna görə də onların qələbə qazanmaq şansı daha çoxdu.
Neftçi – Rəvan
Bu, yəqin ki, hər iki komanda üçün çətin oyun olacaq. Fikrimcə, “Neftçi” bu görüşdə öz liderliyini qorumağa çalışacaq. Hər halda komanda çempionluğa oynayırsa, xal itirməməlidi. Düzdü, “Rəvan” sürprizləri xoşlayan komandadı. Amma “Neftçi”nin bu komandanı məğlub edəcəyini düşünürəm.
