26 fevral 2012 00:26
Rizvan Umarov: Osasuna mənimlə həqiqətən maraqlanır
Futbol üzrə Azərbaycan yığmasının hücumçusu Rizvan Umarov azerisport.az saytına müsahibəsində millimizdəki debütündən, Sinqapurla yoxlama matçından (2:2), İspaniya La Liqa təmsilçisi “Osasuna”nın maraq dairəsində olmasından və gələcək planlarından danışıb. 19 yaşlı hücumçu öncə millimizdəki debütünə toxunub:
“Şadam ki, məni yığmanın start heyətində meydana buraxmışdılar. Bu, mənim Azərbaycan millisindəki debüt oyunum idi. Hansı ki, bunu çox gözləmişdim”.
Oyuna gəlincə, Umarov bunları dilə gətirib: “Biz bu oyunda qələbə qazanmalıydıq. Rəqibdən güclü idik. Amma ələ düşən imkanlardan lazımınca yararlana bilmədik. Əvəzində onlar qol vurmağı bacardılar və qələbəni əldən verməli olduq”.
Millimizin gənc forvardı İspaniyanın üçüncü liqasında çıxış edən “Deportivo Kastelyon”la münasibətlərinə də toxunub: “Mən artıq “Deportivo”nun oyunçusu deyiləm. Klubun futbolçulara ödəyəcək pulu yoxdu. Buna görə də hamı kimi, mən də özümə başqa klub axtarışına çıxmışam. “Deportivo” ilə müqaviləm də qüvvədən düşüb və azad agentəm”.
Umarovun sözlərinə görə, hazırda onun xidmətində digər İspaniya klubu, La Liqada çıxış edən “Osasuna” maraqlıdı: “Osasuna” həqiqətən mənimlə maraqlanır. Amma hələ müqavilə bağlamamışıq. Çünki ortada konkret heç nə yoxdu”.
Bəzi Azərbaycan klublarının da Umarovla maraqlandığı bildirilsə də, o, heç bir təklif almadığını deyir: “Azərbaycandan mənimlə heç kim maraqlanmayıb, müraciət etməyib. Təklif də yoxdu. Azərbaycanda oynamağa razı olardımmı? Niyə də yox? Hər şey təklifdən, komandanın qarşısındakı hədəflərdən asılıdı”.
