27 fevral 2012 17:33
Azərbaycan əsilli futbolçu Ermənistan yığmasından imtina etdi
Ermənistan milli komandasına çağırılan azərbaycanlı futbolçu Norayr Məmmədov heyətdən kənarlaşdırılıb. Azerisport.az xəbər verir ki, bu barədə qərarı yığmanın baş məşqçisi Vardan Minasyan verib.
Lakin Minasyanın bu addımı hansı səbəbdən atdığı məlum deyil. Ermənistan yığması fevralın 28-də Serbiya, ertəsi gün isə Kanada ilə yoldaşlıq görüşü keçirəcək. Minasyan Kiprdə təşkil olunacaq oyunlara əvvəlcə 31 futbolçu çağırsa da, sonradan 3-dən imtina edib. Onlardan biri də Norayrdır. Sonradan məlum olub ki, Norayr özü yığmada oynamaqdan imtina edib. Futbolçu bunu hazırkı klubunun qarşıda iki ciddi oyununun olması ilə izah edib.
Qeyd edək ki, Norayr Məmmədov 25 mart 1991-ci ildə Ermənistanda tarixi Azərbaycan torpağı olan Sünik vilayətinin Qaraunc kəndində doğulub. Onun atası azərbaycanlı, anası ermənidir. Məmmədov peşəkar karyerasına Hollandiyanın “Vendam” klubunda başlayıb. Sonradan bu ölkənin “Kambur” və “Qroningem” komandalarında da çıxış etmiş futbolçu hazırda I divizionun lideri “Evolle”nin formasını geyinir. 21 yaşlı yarımmdafiəçi yığmada hələ debüt etməyib. (lent.az)
