28 fevral 2012 11:57
“Çalışmalıyıq ki, layiqli oyunumuzla onları sevindirək”
Azerisport.az sizi “Bakı”nın əsas komandasında debüt edən 18 yaşlı hücumçu Tural Qürbətovun müsahibəsi ilə tanış edir.
- Tural, öncə futbola gəlişin barədə danışardın...
- Uşaqlıqda futbola çox böyük həvəsim var idi və həyətdə uşaqlarla futbol oynamağı çox sevirdim. Helə oldu ki, bir dostum oyunumu görüb, məni o vaxt “Şəfa” klubunun aşağı yaş qrup komandasına yazdırdı və 5 ay orada oynadım. 2004-ci ildə “Azəri” klubuna keçdim.
- Necə oldu ki, “Bakı” klubuna gəldin?
- 2008-ci ildə “Azəri” klubu dağılandan sonra “Bakı” U-17 komandasının çalışdırıcısı Məqsəd Yaqubəliyev məni bura cəlb etdi. Onun rəhbərliyi altında bir müddət oynadıqdan sonra Nazim Suleymanov məni əvəzedici heyətə dəvət etdi. Sonradan isə bu vəzifəyə Qəhrəman Əliyev təyin olundu və biz əvəzedicilər arasında Azərbaycan çempionu adını qazandıq.
- Bundan sonra əsas heyətə cəlb olundun...
- Bəli, çempion olduqdan sonra əsas heyətə beş futbolçu cəlb olundu və bu beş futbolçu arasında mənim də adım var idi.
- Sənin üçün əsas heyətdə çıxış etmək necə hisslərlə yadda qalır?
- Əlbəttə bu çox sevindirici bir haldır, hər bir gənc futbolçunun arzusudur ki, əsas heyətdə çıxış etsin. Bu bizim üçün bir fürsətdir, öz növbəmizdə çalışmalıyıq ki, bu fürsətdən maksimum yararlanaq və özümüzü yaxşı tərəfdən göstərək və Azərbaycan futboluna xidmət edək.
- Bəs, milli komandaya necə dəvət aldın?
- Bəli, keçən il məni Azərbaycanın U-19 milli komandasına çağırdılar və Avropa çempionatında iştirak etdim. Millinin heyətində çıxış etmək mənim üçün böyük şərəfdir.
- Antalyada “Bakı”nın qış təlim-məşq toplanışında iştirak etmisən...
- Qış hazırlığı çox yaxşı keçdi. Bizə klub rəhbərliyi tərəfindən hər bir şərait yaradılmışdı. Antaliyada beş yoxlama oyunu keçirdik. Bu oyunlarda baş məşqçimiz Aleksandr Starkov biz gənclərədə şans verdi. Məğlub olsaq da,əvəzsiz təcrübə qazandıq.
- “Simurq”la oyunda baş məşqçi sənə ilk dəfə etimad göstərdi, bu oyun necə yadda qalıb?
- Çox sevinirəm ki, baş məşqçi bu oyunda məni meydana buraxdı. Çalışdım ki, bunun təsadüf olmadığını sübut edim. Oyun çox maraqlı keçdi və sonda gülən tərəf biz olduq. Sevinirəm ki, debüt oyunumda komandamız qələbə qazandı.
- Növbəti turda “İnter” lə qarşılaşacaqsınız. Komandanın hazırlığı necə keçir və bu oyunda meydana çıxmaq şansın varmı?
- “İnter” klubu Azərbaycanın ən güclü klublarından biridir və turnir cədvəlinin ikinci pilləsində qərarlaşıb. Biz bu oyuna çox ciddi hazırlaşırıq və meydana ancaq qələbə qazanmaq üçün çıxacağıq. Əgər baş məşqçimiz mənim oynamağımı məsləhət bilsə, çalışacağam ki, bu etimadı doğruldum. Başda Hafiz Məmmədov olmaqla klub rəhbərliyinə gənc futbolçulara dəstəyə və ən yüksək şəraət yaratdıqlarına görə minnətdarlığımızı bildirirəm. Biz də öz növbəmizdə çalışmalıyıq ki, layiqli oyunumuzla onları sevindirək. (klub saytı)
