29 fevral 2012 15:21
“Karyeramda ilk dəfə belə halla Azərbaycanda rastlaşdım”
Premyer Liqanın 21-ci turunun "Simurq" - "Bakı" (0:2) qarşılaşmasının ikinci hissəsidə ardıcıl iki sarı və nəticədə qırmızı vərəqə alaraq meydanı tərk edən Mario Luis Horvat bununla bağlı fikirlərini bölüşüb. Azerisport.az xəbər verir ki, klubun rəsmi saytına müsahibə verən Horvat bu haqda belə danışıb:
"Səfər oyunumuz maraqlı alındı. "Simurq" güclü komandadır və biz bunu oyunun ilk dəqiqələrindən hiss etdik. Qarşılaşmanın əvvəlində hesabı açmağımız işimizə yaradı. Sonadək üstünlüyü əldən vermədik və ikinci qolu vuraraq inamlı qələbə qazandıq".
Oyunun hakimi tərəfindən qırmızı vərəqə ilə cəzalandırılaraq meydanı tərk etmək məcburiyyətində qalan futbolçu buna da münasibət bildirib: "İlk halda 100% sarı vərəqəlik qayda pozuntusuna yol verdim. Ancaq ikinci epizodda nəyə görə cəzalandırıldığımı başa düşmədim. Mən xasiyyətcə intizamlı futbolçuyam. Komandamızı azlıqda qoyduğum üçün üzgünəm. Bununla belə, bir daha təkrar edirəm ki, qırmızı vərəq almağım çox gözlənilməz oldu. Mən həyatımda ilk dəfə idi ki, qırmızı vərəqə alaraq meydanı tərk edirdim. Karyeram ərzində ilk dəfə belə halla Azərbaycanda rastlaşdım. Yaxşı ki, bu oyunda qalib gəldik. Yoxsa, bunu özümə bağışlamazdım".
