1 mart 2012 01:24
Qurban Qurbanov: Foqts onlardan lazım bildiyini tələb edir
Birləşmiş Ərəb Əmirliklərinin Dubay şəhərində keçirilmiş futbol üzrə Azərbaycan və Fələstin yığmaları arasındakı yoxlama matçından sonra millimizin düşərgəsində olan “Qarabağ”ın baş məşqçisi Qurban Qurbanov azerisport.az saytının suallarını cavablandırıb.
- Məğlubiyyətin əsas səbəblərini nədə görürsünüz?
- Mən məğlubiyyətin səbəbləri haqda danışmaq istəməzdim. Çünki həmkarımın işini müzakirə etmək mənim haqqım deyil.
- Gəlin onda futbolçular haqda danışaq...
- Düşünürəm ki, biz bu gün çox səhvlər buraxdıq. Çoxlu boş sahələr vardı, rəqib özünü çox rahat hiss edirdi. Ancaq bu oyunların keçirilməsində də məqsəd problemləri görmək və onların həllini tapmaqdı.
- Bu gün meydanda sizin “Qarabağ”dan olan bir neçə yetirməniz vardı. Onlardan biri - Rəşad Sadiqov qırmızı vərəqə almaqla “fərqləndi”. Deyə bilərsiniz onu nəyə görə meydandan qovdular?
- Düzünü deyim, mən heç nə anlamadım. Əlbəttə, hakimə bəllidi.
- Ancaq o, kifayət qədər tərəfkeş hakimlik etdi...
- Tərəfkeş deməzdim. O, hər iki tərəfə səhv etdi. Bizə qarşı daha çox səhv etdi. Ümumiyyətlə hakimlik bu gün kifayət qədər aşağı səviyyədə idi və bu müəyyən mənada oyunun nəticəsində də əksini tapdı.
- Sadiqovun qovulmasından sonra yığma necəsə fəallaşdı, sezdiniz?
- Bəli, mən deyərdim ki, biz daha fəal oynamağa başladıq. Futbolda belə olur. Bir oyunçunu oyundan kənarlaşdıranda bütün komanda daha toparlanmış, səfərbər olur.
- Sizcə, Fələstin yığması Azərbaycan çempionatında yüksək yerlər uğrunda mübarizə apara bilər?
- Bu suala cavab verə bilmərəm.
- “Qarabağ”ın bəzi oyunçularının klubdan fərqli yığmada tam başqa futbol göstərdikləri haqda fikir var. Niyə belə olur?
- Hər bir məşqçinin oyuna öz baxışı var. Foqts onlardan lazım bildiyini tələb edir. Eyni ilə bunu mən də edirəm.
- Sirr deyilsə, Berti Foqtsla nə haqda danışırdınız?
- Azərbaycan yığmasının gələcəyini müzakirə edirdik.
- Nə qədər uzağa boylandınız?
- Kifayət qədər uzağa. 2016-cı ilə qədər. Klub məşqçiləri Foqtsu istənilən vaxt onların dəstəyinə güvənə biləcəyinə əmin etdilər. Biz öz oyunçularımızı milli komandaya kömək üçün toplanışlara buraxmağa hazırıq.
