1 mart 2012 14:26
Yığmamız 6 pillə geriləyə bilər
FİFA-nın rəsmi saytı hələ də futbol üzrə Azərbaycan və Fələstin yığmaları arasında ötən gün keçirilən yoldaşlıq oyununu rəsmi siyahıya salmayıb. Azerisport.az xəbər verir ki, dünya futbol qurumu yığmamızın son yoxlama matçı kimi Hindistan üzərində qazandığı qələbəni (3:0) göstərir.
Bu isə Fələstinlə oyunun nəticəsinin ləğv olunacağına dair proqnozları daha da gücləndirir. Məsələ burasındadı ki, komandamızın 0:2 hesabıyla uduzduğu görüşün baş hakimi bir gün öncə dəyişdirilib. Bu qarşılaşmanı idarə edən Birləşmiş Ərəb Əmirliklərindən olan hakim isə yığmamıza qarşı ədalətsiz qərarları ilə komandamızın məğlubiyyətində mühüm rol oynayıb.
Hələlik, FİFA-nın bu qalmaqallı məsələ ilə bağlı hansı yekun qərarı çıxaracağı məlum deyil. Lakin görüşün nəticəsi bu qurum tərəfindən nəzərə alınsa, millimizin mart ayı üçün açıqlanacaq reytinq siyahısında 6 pillə geriləməsi ehtimalı var.
