8 mart 2012 00:18
Hafiz Məmmədovdan Sadıq Sadıqova qardaşlıq mesajı (FOTO)
Futbol üzrə Azərbaycan Premyer Liqası 19-cu turunun təxirə salınmış “Bakı” - “Neftçi” qarşılaşmasını stadionda izləyənlər arasında bu klubların prezidentləri də yer alırdı. Azerisport.az xəbər verir ki, “Bakı”nın prezidenti Hafiz Məmmədov və onun “Neftçi”dən olan həmkarı Sadıq Sadıqov oyunu sonadək maraqla izlədilər.
Meydan sahiblərinin məğlub olmasına baxmayaraq, “Bakı”nın prezidenti Hafiz Məmmədov təmkinini itirmirdi. Qonaq komandanın rəhbərini qələbə münasibəti ilə təbrik edən Hafiz Məmmədov “Neftçi”nin 3 xalı layiqincə qazandığını söylədi:
“Neftçi” Azərbaycan çempionu və cari çempionatın lideridi. Bu komandanın gücü məlumdu. “Neftçi” səviyyəli futoblçulardan təşkil olunmuş və oturuşmuş komandadı. Bu amil onların uğur qazanmasının əsasıdı. Bizim komandaya gəldikdə isə, hələ heyətlə bağlı problemlərimiz var. Yeni futbolçularımız güclü oyunçular olsalar da, komandaya tamamilə uyğunlaşa bilməyiblər. Xətlərarası rabitə də nizamsız təsir bağışlayır və istənilən qaydada deyil. Məncə, “Neftçi” bu gün layiqli qələbə qazandı.
“Neftçi” klubunun rəhbəri və bizim yaxın dostumuz Sadıq Sadıqov idman sahəsində öz sözünü demiş təcrübəli bir mütəxəssisdi. Təsadüfi deyil ki, “Neftçi” onun rəhbərliyi altında yüksəliş dövrünü yaşayır. İki güclü rəqibin mübarizəsində ehtiraslar həmişə yüksək həddə olur. Bu idmandı. Mübarizə anında müxtəlif xoşagəlmız hallar yaşana bilər. İstisna deyil ki, müəyyən arzuolunmaz hərəkətlər yer alsın. Ancaq bu neqativ hallar iki klubun möhkəm təməllər üzərində qurulan dostluğuna və əməkdaşlığına xələl gətirə bilməz. Vaxtı ilə klublarımız arasında hansısa xırda anlaşılmazlıqlar yaşansa da, bütün bunlar geridə qalıb.
“Bakı” və “Neftçi” qardaş klublardı. Biz birlikdə Azərbaycan futbolunun inkişafı naminə çalışırıq. Bir daha “Neftçi”ni təbrik edirəm, onlara gələcək oyunlarda uğurlar arzulayıram”.
