9 mart 2012 17:25
Qəbələ - Neftçi matçı yenidən oynanılacaq
AFFA İntizam Komitəsinin iclası keçirilib. Azerisport.az xəbər verir ki, aparılan müzakirələrdən sonra Premyer Liqada çıxış edən klubların əvəzedici heyətləri arasında keçirilən ölkə çempionatının son turunun, eləcə də U-16 Liqanın oyunları ilə bağlı aşağıdakı qərarlar çıxarılıb.
Premyer Liqada çıxış edən klubların əvəzedici heyətlərinin 19-cu turunun “İnter” – “Rəvan” matçının 90+2-ci dəqiqəsində “Rəvan”ın futbolçusu Yamin Ağakərimzadə idmançıya yaraşmayan hərəkətə görə ikinci sarı vərəqə alaraq meydandan kənarlaşdırıldığı üçün 1 oyunluq cəzalanıb, klubu 100 manat cərimə olunub.
5 mart 2012-ci il tarixində U-16 Liqanın “Qəbələ” – “Neftçi” matçı geyim dəstlərinin eyni olması səbəbindən baş tutmayıb. Belə ki, “Qəbələ” futbol klubu meydan sahibi olduğu üçün ağ rəngli geyimdə oynayacağını bildirib. Eyni zamanda “Neftçi” klubu da eyni rəngdə geyim forması ilə meydana çıxıb, lakin sonradan köynəklərini ağ-qara rəngə dəyişdiriblər (hər iki klubun şort və getrləri ağ rəngdə olub). Lakin matçın hakimi baş vermiş hadisələrə baxmayaraq yekunda qətiyyətsizlik edərək oyunu keçirməyib. Bu səbəbdən U-16 Liqasının “Qəbələ” – “Neftçi” matçı yenidən oynanılsın.
Matçın hakimi barədə Hakimlər Komitəsi, oyunun hakim-inspektoru haqqında isə Hakim-İnspektorlar Komitəsi lazımi ölçü götürüb İntizam Komitəsinə məlumat versin.
