10 mart 2012 20:09
Qarabağ və Xəzər Lənkəran azarkeşlərini sülhə çağırdı
Bu gün “Qarabağ” və “Xəzər Lənkəran” klubları arasında görüş keçirilib. Azerisport.az xəbər verir ki, görüşdə “Qarabağ”ın direktoru Emrah Çelikel və “Xəzər Lənkəran”ın vitse-prezidenti Tuyqun Nadirov başda olmaqla “Qarabağ”ın “İmarət” fan-klubu, “Xəzər Lənkəran”ın fanklubları və azarkeşlər iştirak ediblər.
Tədbirin mövzusu Premyer Liqanın ilk dövrəsində Suraxanı qəsəbə stadionunda baş tutmuş “Qarabağ” – “Xəzər Lənkəran” oyunu zamanı baş vermiş xoşagəlməz hadisələrin aydınlaşdırılması və 2 yaxın klubun azarkeşləri arasında dostluq körpüsünün yaradılması olub. “Qarabağ”ın direktoru Emrah Çelikel futbolun idmanın şahı olduğunu dilə gətirərək bu oyunun insanları birləşdirən dəyər olduğunu bildirib. Suraxanıda baş tutmuş oyunda baş verənlərin təsadüf olduğunu, 2 böyük camiə azarkeşlərinin nümunə olması gərəkdiyini vurğulayıb. “İmarət” fan klubunun ictimai fəallığını örnək olduğunu, bu görüşün baş tutmasının onların tolerant mövqeyi ilə əlaqələndirən baş direktor Ağdamda azarkeşlərin “Xəzər Lənkəran”ı ən gözəl şəkildə qarşılayacaqlarına inandığını bildirib.
“Xəzər Lənkəran”ın vitse-prezindenti Tuyqun Nadirov da ölkənin 2 ən böyük azarkeş camiəsinə malik klubların meydanda rəqib, kənarda isə qardaş olduğunu vurğulayıb. Ən maraqlı futbol mücadilələrinin məhz 2 komanda arasındakı oyunlarda qeyd olunduğunu bildirib. Baş vermiş hadisənin səbəbkarını qınadığını bildirərək bu üzücü olayın unudulmasının və daha böyük dostluğun yaranmasına şərait yarandığını bildirib.
Ardınca azarkeşlər də çıxış ediblər. Hər 2 klubun azarkeşləri baş verən hadisəni pisləyərək stadionda təxribat yaradan, öz millətinə qarşı etik olmayan hərəkət edənlərin əsl azarkeş olmadığını bildiriblər. “Qarabağ” və “Xəzər Lənkəran”ın Azərbaycan futbolu üçün böyük işlər gördüyü vurğulanıb. Səmimi söhbət şəraitində keçən görüşdə tərəflər meydanda rəqib olub, meydandan kənarda isə daha sıx əməkdaşlıq edib, ictimai-sosial əməkdaşlıqla bağlı razılığa gəliblər. Sonda tərəflər xatirə şəkili çəkdiriblər.
