12 mart 2012 17:23
Ramin Musayev: Bu, Eurovisionla bağlı deyil
“Azərbaycanda futbol mövsümünün erkən başa çatması “Eurovision” müsabiqəsi ilə bağlı deyil”. Azerisport.az xəbər verir ki, bunu Peşəkar Futbol Liqasının (PFL) prezidenti Ramin Musayev deyib.
2011-2012-ci il mövsümünə mayın 17-də keçiriləcək Azərbaycan Kubokunun final matçı ilə yekun vurulacaq. Halbuki indiyədək ölkəmizdə futbol mövsümü mayın 23-dən tez başa çatmayıb. Belə erkən finişi mayın 22-də Bakıda “Eurovision” Beynəlxalq Mahnı Müsabiqəsinin start götürəcəyi ilə əlaqələndirənlər də var.
Lakin Musayev bunu UEFA-nın tələbi ilə əlaqələndirib: “İyunun 8-də Polşa və Ukraynada Avropa çempionatı start götürəcək. Bununla əlaqədar UEFA Avropa ölkələrindəki bütün çempionat və kubok yarışlarını mümkün qədər erkən başa vurmağı tövsiyə edib. Ona görə də biz mövsümü mayın 17-də yekunlaşdırmağı qərara almışıq”.
Qeyd edək ki, UEFA-nın təşkil etdiyi daha 2 turnir də erkən başa çatacaq. Avropa Liqasına mayın 9-da, Çempionlar Liqasına isə mayın 19-da yekun vurulacaq. (lent.az)
