12 mart 2012 11:58
Qızlar festivalı (FOTOREPORTAJ)
Azərbaycanda qadın futbolunun inkişafı çərçivəsində gerçəkləşəcək silsilə layihələrdən biri “Live Your Goals” (“Öz Məqsədini Yaşat”) proqramının təqdimatı və qarşıdan gələn FIFA U-17 qadınlararası dünya çempionatı Azərbaycan 2012-yə həsr olunmuş futbol festivalı keçirilib. Azerisport.az xəbər verir ki, AFFA Futbol Mərkəzindəki «Dalğa Arena»da təşkil olunmuş tədbirdə müxtəlif təşkilatların, dövlət qurumlarının, futbol ictimaiyyətinin və Kütləvi İnformasiya Vasitələrinin 200 nəfərə yaxın nümayəndəsi iştirak edib. Jurnalistlər üçün təşkil olunmuş mətbuat konfransında qarşıdan gələn dünya çempionatı çərçivəsində qadın futbolunun inkişafı layihələri haqda məlumat verilib və qadın futbolu üzrə səfir Steffi Cons, 17 yaşadək qızlardan ibarət Azərbaycan yığmasının baş məşqçisi Sissi Rayt və AFFA-nın baş katibi Elxan Məmmədov sualları cavablandırıblar.
Futbol festivalında çıxış edən AFFA-nın baş katibi Elxan Məmmədov qızların futbola həvəsinin artmasının sevindirici olduğunu və soyuq hava şəraiti ucbatından festivalın planlaşdırıldığı kimi baş tutmamasına təəssüfləndiyini bildirib. Azərbaycanda ilk dəfə səfərdə olan Steffi Cons bu tədbirdə iştirak etdiyi üçün məmnunluğunu dilə gətirib. Çıxışlardan sonra Steffi Cons, millət vəkilləri Rauf Əliyev və Sevda Həsənova, Azərbaycan milli komandasının baş məşqçisi Berti Foqts tərəfindən FIFA-nın qadın liqalarına əvvəlcədən hədiyyə verdiyi idman ləvazimatı rəmzi şəkildə 11 oyunçuya təqdim edilib.
Steffi Cons və FIFA-nın Qadın Futbolu üzrə Təlimatçısı Vera Pauv festivalda iştirak edən qızlarla görüş keçirib, qadın futbolu ilə bağlı müxtəlif sualları cavablandırıblar.
Müğənni Çingiz Mustafayev Azərbaycanda ilk dəfə keçirilən Qızlar Futbol Festivalının iştirkaçılarını ifa etdiyi mahnılarla əyləndirib. Çempionatın rəsmi talismanı və U-17 qızlar yığmamızın üzvləri də tədbirdə iştirak edib.
Növbəti festivalın aprelin sonlarında Zaqatala rayonunda keçirilməsi nəzərdə tutulub. (AFFA)
