13 mart 2012 14:15
Xəzər Lənkəran bunu ilk dəfə gördü
Premyer Liqanın 23-cü turunu da səfərdə keçirən “Xəzər Lənkəran” özü üçün qeyri-adi göstəricini rəsmiləşdirib. Azerisport.az xəbər verir ki, Lənkəran klubu ardıcıl 4-cü dəfə səfərdə meydana çıxıb.
Fevralın 21-də “Qəbələ”nin (1:2), martın 3-də “Sumqayıt”ın (3:0), 7-də “Turan”ın (1:0) qonağı olmuş komanda bu dəfə də “Qarabağ”ın (0:1) meydanında oynayıb. Sonuncu dəfə öz meydanında fevralın 15-də AZAL-la oynayan “Xəzər Lənkəran” 8 illik tarixində belə halla üzləşməmişdi. Ən pis halda komanda ardıcıl 3 səfər matçında qüvvəsini sınamışdı. Belə hal 5 müxtəlif vaxtda yaşanıb.
Lakin bu dəfə lənkəranlılar ardıcıl 4-cü səfər matçına çıxıb. Qarşıda isə daha 1 səfər matçı var. Belə ki, kubokun martın 14-də keçiriləcək 1/4 final mərhələsinin ilk oyunu “İnter”in meydanında keçiriləcək.
Qeyd edək ki, “Xəzər Lənkəran” növbəti dəfə evdə martın 18-də “Bakı” ilə oynayacaq.
