14 mart 2012 15:41
Foqts: Kubok bir oyundan ibarət olsaydı, daha maraqlı olardı
Bu gün keçirilən Azərbaycan kubokunun 1/4 final mərhələsinin “Qəbələ” – “Qarabağ” oyununu izləyənlər arasında millimizin baş məşqçisi Berti Foqts da var. Azerisport.az xəbər verir ki, o, sözügedən matçın fasiləsi zamanı qarşılaşma ilə bağlı fikirlərini bildirib.
Almaniyalı mütəxəssis ardıcıl üçüncü dəfədi “Qəbələ”nin oyununu izləməsinin təsadüf olub-olmamasıyla bağlı suala belə cavab verib: “Mən “Xəzər Lənkəran” və “Neftçi”ylə matçlara da baxdım. Bu gün “Qarabağ”ın oyununu da izləmək qərarına gəldim. Yəni hər şey daha çox bu komandanın liderlərlə üz-üzə gəlməsindən asılıdı. Birdə ki, hər dəfə Bakıdan Qəbələyə gələndə burada gözəl mənzərənin şahidi oluram və bundan həzz alıram”.
Foqts həmçinin deyib ki, kubok oyunları vaciğ olduğundan bu qarşılaşmanı canlı izləmək qərarına gəlib: “Azərbaycan kubokunun 1/4 final mərhələsi bir oyundan ibarət olsaydı, daha maraqlı olardı. Çünki cütlüyün taleyi bugünkü oyundan deyil, təkrar görüşdən asılı olacaq. Mən üç gün əvvəl burada “Qəbələ”nin “Neftçi”ylə oyununu da izlədim. Deyərdim ki, bugünkü qarşılaşma üç gün əvvəlki oyundan daha maraqlıdı”.
