15 mart 2012 19:27
Əfran İsmayılovdan ilin futbolçusu iddiası
Bu gün Premyer Liqasında fevral ayının ən yaxşı futbolçusu seçilmiş “Qarabağ”ın və Azərbaycan milli komandasının futbolçusu Əfran İsmayılovun mükafatlandırma mərasimi keçirilib. Azerisport.az xəbər verir ki, tədbirdə 24 yaşlı yarımmüdafiəçiyə Peşəkar Futbol Liqası tərəfindən hədiyyələr, baş sponsor tərəfindən isə 1111 manat pul mükafatı təqdim olunub.
Mükafatlandırma mərasimindən sonra İsmayılov ilin futbolçusu olmağa çalışacağını bildirib: “Açığı, qalib olacağımı gözləmirdim. İşimiz futbol oynamaqdır. Hazırda bütün diqqətimizi ölkə çempionatı və kubok mübarizəsinə yönəltmişik. Sağ olsunlar ki, belə nominasiya təsis ediblər. Bu addım insanı daha da stimullaşdırır”.
Futbolçu “Qarabağ”ın çempionluğu barədə hələ düşünmədiyini də söyləyib: “Qarşıda çətin oyunlar var. Hələ çempionluq barədə düşünmürük. Sona ən azı 3 tur qalmış bu barədə fikirləşmək olar”.
İsmayılov hər bir müdafiəçiyə qarşı oynamağın çətin olduğunu da vurğulayıb.
Qeyd edək ki, “ayın futbolçusu” sorğusunda Premyer Liqanın 12 klubu və 33 KİV nümayəndəsi iştirak edib. Respondentlər ilk dəfə 16 namizəd irəli sürüblər. İsmayılovun namizədliyini jurnalistlərin 33 faizi dəstəkləyib. 24 yaşlı yarımmüdafiəçi baş məşqçilər və komanda kapitanları arasında 22 mümkün səsdən 6-nı qazanıb.
