15 mart 2012 12:33
Georgi Çixradze: Simurq heç də yaxşı vaxtlarını yaşamır
“Əlbəttə, “İnter”dən ayrılmaq çox çətin oldu. Bu müddət ərzində komandaya alışmışdım. Deyim ki, “İnter”də işləməyə kömək edən yaxşı atmosfer hökm sürür. Burada çox yaxşı kollektiv var və bu klubla məni həmişə isti münasibət və xatirələr bağlayacaq”. Azerisport.az xəbər verir ki, bu sözləri “İnter”in sabiq məşqçisi, bir neçə gün əvvəl “Simurq”un baş məşqçisi təyin olunan Georgi Çixradze deyib.
Gürcü çalışdırıcı həmyerlisi, “İnter”in baş məşqçisi Kaxaber Tsxadadzenin onun gedişini normal qarşıladığını bildirib: “Kaxaber “Simurq”a təyinatıma çox hörmətlə yanaşdı. Etiraf edim ki, “İnter”də çalışdığım ilk gündən o, qeyd etmişdi ki, əgər mənə hər hansı bir təklif edilərsə, o zaman buna anlaşıqlıqla yanaşacaq və mənim gedişimdə heç bir problem yaranmayacaq. Səmimi desəm, bunadək mənə bir neçə dəfə təklif göndərilmişdi, lakin mən onları heç nəzərdən keçirməmişdim”.
Çixradze “Simurq”un yaxşı günlərini yaşamadığını bildirib: “Səmimi desəm, “Simurq”a dəvət mənim üçün yeni çağırışdı. Klubun rəhbərliyi mənə müraciət etdi və onlara kömək etmək qərarına gəldim. Hazırda bu komanda özünün heç də yaxşı vaxtlarını yaşamır və mən onu toparlamağa çalışacağam, mübarizə bacarığı olan kollektiv yaratmağa cəhd göstərəcəyəm”.
