Ağasəlim Mircavadov: Bu, Yunis Hüseynov üçün əla şansdı

“Xəzər Lənkəran”ın sabiq baş məşqçisi Ağasəlim Mircavadov Yunis Hüseynovun bu komandanın sükanı arxasına keçməsinə münasibətini açıqlayıb. Azerisport.az saytına müsahibəsində o, öncə bunları dilə gətirib:

“İstənilən baş məşqçi rəhbərliklə birgə çalışmaıdı. Əgər rəhbərlik və futbolçular səni dəstəkləmirsə, onda orda çalışmağın faydası yoxdu. Cüneyt Biçər çox duruş gətirə bilmədi. Çünki bizim klublar dərhal çempion olmağı, kubok qazanmağı tələb edirlər. Avropada belə deyil. Baş məşqçiyə heyət formalaşdırmağa imkan verirlər, sonra nəticə istəyirlər. Bizim çempionatda isə hətta bir mövsüm çalışmaq da böyük şeydi.

Yunis Hüseynova gəlincə, ona inanıram. Böyük uğurlar qazana bilər. Yunis futbolçu kimi də Azərbaycanın ən parlaq oyunçularından biri idi. Sonradan məşqçi kimi formalaşdı. Bu təyinat onun üçün əla şansdı. “Xəzər Lənkəran”da komanda üçün hər cür şərait yaradılıb. Odu ki, Yunisin Azərbaycanda necə yaxşı mütəxəssislər olduğunu göstərmək üçün əla imkanı var”.