17 mart 2012 13:25
Xəzər Lənkəranda daha bir məşqçi təyinatı
“Xəzər Lənkəran” daha bir məşqçi ilə münasibətlərini rəsmiləşdirib. Azerisport.az xəbər verir ki, Lənkəran klubu ilə iki il müddətinə müqavilə imzalamış Zakir Mahmudov komandada köməkçi-məşqçi vəzifəsində çalışacaq.
Qeyd edək ki, mütəxəssisin son iş yeri birinci divizion klubu “Karvan” (Yevlax) olub. “Xəzər Lənkəran”dan təklif alana qədər məhz bu kluba rəhbərlik edən Mahmudovun komandası hazırda turnir cədvəlinin ikinci pilləsində yer alıb. O, əvvəllər “Karvan” və “Standard”da Yunis Hüseynovun köməkçisi olub.
Sonda onu da bildirək ki, Mahmudovla yanaşı Zamin Əsədullayevin də cənub klubunda çalışacağı bildirilirdi. Lakin bu təyinat rəsmiləşməyib. Beləliklə, yeni baş məşqçi Yunis Hüseynovun komandası Mahmudov, Zaur Ramazanov və qapıçılarla işləyən Hafiz Əliyevdən ibarət olacaq. Alim Qurbanov isə oynayan-məşqçi funksiyasını yerinə yetirəcək.
