19 mart 2012 14:16
Georgi Nikolov söz verdi: Heç nə deməyəcəyəm
“İnter”in prezidenti Georgi Nikolov Premyer Liqanın 24-cü turunun “Neftçi” ilə oyunundan öncə rəqib düşərgədə heç də birmənalı qarşılanmayan bəzi açıqlamalar vermişdi. Azerisport.az xəbər verir ki, bolqarıstanlı iş adamı rəqibin son iki oyunda onlara məğlub olmasına işarə vuraraq, “Neftçi” “İnter”in abonentidi” açıqlaması ilə çıxış etmişdi.
Ötən gün baş tutan paytaxt derbisindən sonra isə həm “Neftçi”nin futbolçuları, həm də baş məşqçi Böyükağa Hacıyev onların qələbə qazanmaq (2:1) yolunda əsas motivasiyalarının məhz Nikolovun bu açıqlamaları olduğunu dilə gətirdilər. Bu azmış kimi, onlar hətta əcnəbi iş adamına buna görə etirazlarını da dilə gətirdilər.
Məhz bu üzdən Nikolov da bütün baş verənlərə yenidən münasibət bildirib. O, klubun rəsmi saytı vasitəsilə verdiyi açıqlamada bunları dilə gətirib:
"Şənbə günü səhər hər şey darıxdırıcı idi. Bu hətta sakitləşmək, zarafat etmək mümkün olan yerdə də belədi. Yəni, futbol dünyasında. Ancaq etdiyim zarafatın belə güclü reaksiya doğuracağını gözləmirdim. Dediyim sözlərə görə nahara qədər başım ağrıdı. İdman insana müsbət enerji gətirməlidi. Deyilən hər sözə fikir vermək lazım deyil. Ən yaxşısı əlini yelləyərək gülümsəyib getməkdi. Söz verirəm: növbəti dəfə heç nə deməyəcəyəm ki, rəqibin oyuna köklənməsi heç olmasın".
