19 mart 2012 00:26
Xəzər Lənkərandan Bakı ilə oyun öncəsi xeyirxah addım
“Xəzər Lənkəran” Futbol Klubunun kollektivi klub prezidenti Mais Mənsimovun təşəbbüsü ilə Lənkəran şəhərində yerləşən Osman Mirzəyev adına Qarışıq tipli internat məktəbini ziyarət edib. Azerisport.az xəbər verir ki, klubun yarandığı zamandan mövcud olan ənənəyə sadiq qalaraq, komanda üzvləri Novruz bayramı öncəsi uşaqlarla görüşərək onlara bayram hədiyyəsi edib.
Komanda üzvləri ilə yanaşı “Xəzər Lənkəran”ın FK-nun vitse-prezidenti Tuyqun Nadirov və klubun direktoru Höccət Hacıyev də tədbirdə iştirak etdilər. Futbolçular uşaqlara klubun müxtəlif atributikasından ibarət hədiyyələr veriblər. Uşaqlar isə bunun qarşılığında hazırladıqları konsert proqramı ilə çıxış ediblər. Maraqlı proqramda uşaqlarla yanaşı oyunçuların da iştira etməsi xüsusilə yaddaqalan olub.
İnternat məktəbinin rəhbərliyi “Xəzər Lənkəran” FK-na bu ziyarətə görə təşəkkürünü bildirib və komandanın gəlişinin burada hər zaman sevinclə qarşılandığını klub rəsmilərinin nəzərinə çatdırıb. Öz növbəsində klub rəhbərliyi bu cür tədbirlərin “Xəzər Lənkəran”ın xoş ənənələrindən olduğunu bildirməklə, bundan sonra da belə ziyarətlərin ediləcəyinə zəmanət verib. Həmçinin klub rəhbərliyi uşaq evinin sakinlərinin “Xəzər Lənkəran”ın oyunlarına gəlib sevimli komandalarını dəstəkləməsi üçün bütün şəraitin yaradılacağına söz verib.
