24 mart 2012 11:25
Premyer Liqa, 25-ci tur: Cüneyt Biçərin proqnozu
“Xəzər Lənkəran”ın sabiq baş məşqçisi Cüneyt Biçər Premyer Liqanın 25-ci turunun oyunları ərəfəsində azerisport.az saytı üçün proqnozlarını açıqlayıb.
Qəbələ - İnter
Son turda “İnter” öz meydanında məğlubiyyətlə üzləşdi. Buna görə onlar qələbə üçün əllərindən gələni edəcəklər. “Qəbələ” isə altılıq mərhələsi başlayandan inamlı çıxışı ilə seçilir. “Bankirlər” üçün bu oyun çox çətin keçəcək. Ən azından qarşılaşma rəqib meydanında keçirildiyi üçün. Belə qarşılaşmaya proqnoz vermək çox çətindi. Amma mən ya “İnter”in qələbə qazanacağını, ya da heç-heçə olacağını düşünürəm.
Neftçi – Xəzər Lənkəran
Bu oyunla bağlı proqnoz vermək istəmirəm.
Bakı – Qarabağ
Bu, iki nəhəngin döyüşü olacaq. Hər iki komandaya qələbə lazımdı. Mən bu görüşdə də aşkar favorit görmürəm. Fikrimcə, yekunda heç-heçə qeydə alınacaq.
AZAL – Kəpəz
Bu oyun ikinci altılıq çərçivəsindəki ən maraqlı oyunlardan biri olacaq. AZAL hazırda bütün diqqətini Azərbaycan kubokuna yönəldib. Ona görə də “təyyarəçilər”in bu dəfə meydana optimal və ya eksperimental heyətlə çıxacağını dəqiq bilmək olmur. Əgər əsas heyətlə oynasalar, AZAL qələbə qazanacaq. Eksperimental heyətlə oynayacaqları halda isə, hər şey ola bilər. Hər halda meydan sahiblərinin qələbəsi daha inandırıcıdı.
Sumqayıt – Simurq
Hər iki komanda demək olar ki, bərabərdi. Zaqatala klubunda baş verən baş məşqçi dəyişikliyinin onlara kömək edəcəyini düşünürəm. Amma “Sumqayıt” da zəif komanda deyil. Onların gənc heyəti var və hər oyunda özlərini sübut etmək istəyirlər. Heç-heçə olacağını düşünürəm.
Turan – Rəvan
“Turan”ı ev komandası adlandırmaq olar. Tovuzda onlar daha yaxşı oynayırlar. Düzdü, komandada hər şey ideal deyil. Amma baş məşqçiləri yaxşı və möhkəm kollektiv yarada bilib. “Rəvan” da möhkəm qoz hesab oluna bilər. Bu komanda hətta hazırda ilk altılıqda mübarizə aparan klublarla da çox yaxşı mübarizə apara bilirdi. Mənə elə gəlir ki, bu oyunda məhz “Rəvan” qalib gələcək.
