26 mart 2012 12:42
Joze Alesio: Rusiya millisini hətta Tümendə də məğlub etmək olar
Futzal üzrə Azərbaycan millisinin baş məşqçisi Joze Alesio da Silva bu gün Bakıda mətbuat konfransı keçirib. Azerisport.az xəbər verir ki, o, sabah Sərhədçi Olimpiya İdman Mərkəzində Azərbaycan və Rusiya milliləri arasında futzal üzrə dünya çempionatının play-off mərhələsinin ilk oyunu öncəsi bəzi sualları cavablayıb.
“Hazırda son hazırlıqlarımızı keçirik. Buna baxmayaraq, artıq demək olar ki, komanda hazırdı. Əlbəttə, Rusiya yığması hazırda daha yaxşı formadadı, nəinki biz. Çünki onların güclü çempionatı var, oyun təcrübələri də yüksəkdi. Təəssüf ki, sabah keçiriləcək oyuna itkilərlə çıxacağıq. Andrey Tveryankin, Maşado Nilson, Rizvan Fərzəliyev kimi oyunçuların yoxluğu özünü hiss etdirməyə bilməz. Bu itkilər məni məyus etsə də, qarşıya baxmalıyıq. Məsələn, Rizvanı Zeynal Zeynalovla əvəzləmək istəyirik”.
Maraq üçün qeyd edək ki, Zeynalov həm də çimərlik futbolu üzrə yığmamızın üzvüdü. Joze Alesio pley-off matçlarında son Avropa birinciliyində yol verdiyimiz səhvlərin təkrarlanmamasını istəyir: “Artıq 15 gündü məşq edirik. Təbii ki, bütün səhvləri bu müddət ərzində aradan qaldırmaq mümkünsüzdü. Amma biz çalışırıqı ki, belə səhvlər mümkün qədər az olsun. Ən azından AÇ-2012-dəki qədər olmasın. Fikrimcə, bu oyunda yerli oyunçular özlərini doğrultmalı, sözlərini deməlidilər”.
Alesio komandasının DÇ-yə yollanmaq şanslarının olduğunu bildirib: “Son AÇ-nin finalçısına qarşı oynayacağıq. Amma buna baxmayaraq, bizim də mərhələ keçmək şansımız var. Lakin bu, çox çətin olacaq. Çünki Rusiya yığması çox aqressiv oyuna üstünlük verir, yaxşı müdafiə olunmağı bacarır”.
Braziliyalı mütəxəssis sonda onu da bildirib ki, onları yalnız qələbə qane edir: “İdeal variant 3-4 qol fərqi ilə qələbə qazanmaq olardı. Amma əsas qələbə qazanmaqdı. Lakin mümkün heç-heçə və məğlubiyyət də cavab oyununda şansları saxlayacaq. Mən Rusiyanı hətta Tümendə də məğlub etməyi mümkün hesab edirəm”.
