27 mart 2012 22:35
Yığmamız Rusiya ilə oyunda gec ayıldı (YENİLƏNİB)
Futzal üzrə dünya çempionatına vəsiqə uğrunda pley-off oyunları keçirilib. Azerisport.az xəbər verir ki, bu il Tailandda keçiriləcək mundiala vəsiqə qazanmağa iddialılar arasında olan Azərbaycan yığması da ilk oyununa bu gün çıxıb.
Joze Alesio da Silvanın rəhbərlik etdiyi yığmamız Rusiya ilə mübarizə aparır. Evdə və səfərdə keçiriləcək iki oyunun nəticəsinə görə daha üstün olan komanda DÇ-yə vəsiqəyə sahib çıxacaq. Bu üzdən də Azərbaycan yığması doğma meydan amilindən yararlanıb, güclü Rusiya ilə görüşdə mütləq fərqli hesabla qalib gəlməliydi.
Çox təəssüf ki, komandamız bu vəzifənin öhdəsindən gələ bilmədi. Yığmamız son dəqiqələrdə ayıldı ki, artıq 3 cavabsız qolla uduzurdu. Qapıçını da meydan oyunçusuyla əvəzləyən Da Silvanın komandası məhz bundan sonra iki qol vurmaqla müəyyən qədər şanslarını saxlamış oldu. Hər halda cavab görüşündə işimiz daha da çətin olacaq. Çünki cavab matçının Tümendə keçirilməsi rusların işinə daha çox yarayır. Həmin görüşün aprelin 9-da baş tutacağını da qeyd edək.
Futzal
DÇ-2012-nin pley-off mərhələsi (ilk oyun)
AZƏRBAYCAN – RUSİYA - 2:3 (0:1)
Hakimlər: Borut Şiviç, Deyan Nikoliç (hər ikisi Sloveniya).
Bakı. “Sərhədçi” Olimpiya İdman Mərkəzi.
AZƏRBAYCAN: 19. Elnur Zamanov, 5. Felipe, 13. Kaka, 14. Vitali Borisov, 18. Jadder Dantas.
Ehtiyat oyunçular: 12. Marat Salyanski (k), 3. İlkin Hacıyev, 4. Serjao, 6. Zeynal Zeynalov, 7. Rəcəb Fərəczadə, 10. Seymur Məmmədov, 11. Namiq Məmmədkərimov.
Baş məşqçi: Alesio da Silva.
RUSİYA: 12. Qustavo, 5. Sergey Sergeyev (k), 10. Konstantin Mayevski, 11. Nikolay Plaxov, 15. İldar Nuqumanov,
Ehtiyat oyunçular: 1. Leonid Klimovski, 2.Vladislav Şayahmetov, 3. Nikolay Pereverzev, 4. Vladimir Çurlayev, 9. Sergey Abramov, 13. Aleksandr Fukin, 14. İvan Milovanov.
Baş məşqçi: Sergey Skoroviç.
Oyun başladı. Yığmamıza uğurlar arzulayırıq!
12. Milovanov adi vəziyyətdə topa toxunaraq hesabı açır - 0:1
16. Qapı dirəyi komandamızı ikinci qoldan xilas edir
Birinci hissə başa çatdı. Yığmamız ilk yarıda bir neçə real qol vəziyyəti yaratsa da, fərqlənə bilmir
İkinci hissə başladı
23. Sergeyev əks-hücumda ikinci qolu komandamızın qapısından keçirir - 0:2
30. Sergeyev özünün ikinci, komandasının üçüncü qolunu vurur - 0:3
36. Kaka buraxılan qollardan birinin əvəzini çıxır - 1:3
39. İlkin Hacıyev son saniyələrdə fərqi minimuma endirir - 2:3
Matç başa çatdı
